1890 kuma British ten Zogam (Chin hills) hong uk teh India tawh gam khat hong suah cihna hi. Tua ma 1886 kumin India sungah Burma koih khin. India zong 1600 kiim pan a keek tohtoh 1858 kumin British ukna nuaiah lutin England kumpi tangin Viceroy and Governor-General in na uk khin. A tomin Zogam pen India gam sunga om Burma Province (State) sunga District khatin hong koih uh. Hong uk dan bel Kawlte Vaite tawh hong khenin hong tuam bawl.
Vaite leh Kawlte pen kibang lo lua mahmah ahih manun Government of Burma Act 1935 dungzuiin 1937 kumin British ten gam nih hong suah hi. Tua pan Zogam kitamkham, Ciau luite zuiin India leh Burma ah kikhen.
Chin hills pen Burma lamah a koih hangun Kawlte tawh gam khat hong suah hi loin British Governor khat in hong uk khawm bek hi. Kawlte pen amatt seat 91 teel theihna hluttaw neisakin Kawl politician-te leh Governor in uk khawm, tua pen Burma Proper kici.
Chin hills pen British kumpi naseem officer ten i ukpite tawh kithuahin hong uk. A tomin Burma leh Chin Hills pen gam tuam a hihna Constitution (Government of Burma Act 1935, Second Schedule – Areas in Burma to which special provisions apply – Part One) ah kician takin tuang hi. Part One sungah Chin Hills, Kachin Hills leh Federated Shan States koih, hih gam thum ukna ding ‘Frontier Areas Administration (FAA)’ ci-in department khat bawl, Taunggyi ah FAA main office kikoih hi. Part One teng pen Excluded Areas kici a, Burma ah kihel lo a cihna.
Kawllai theite ading: Kawlte pen ‘၉၁ ဌာနအုပ်ချုပ်ရေး’ tawh uk, Chin, Kachin leh Shante pen ‘နယ်ခြားဒေသ အုပ်ချုပ်ရေး’ or ‘နယ်စပ်ဒေသ အုပ်ချုပ်ရေး’ tawh hong uk, kibang lo. ၉၁ ဌာနအုပ်ချုပ်ရေး pen mipi ten hluttaw member/seat 91 teel thei cihna hi. တောင်တန်းမြေပြန့် = Frontier areas and Burma Proper,
ပြည်နယ်ပြည်မ = Frontier areas and Burma Proper.
1935 Constitution tawh kum 20 beek hong ki-uk man leh hi ci lel tak lo mah ding hi ve hang, Leitung Galpi nihna suak zenzen, Galpi bei teh British colony gam teng in independent ngen khangkhang, Kawl makai Aung San ten zong London ah Burma Proper leh Frontier Areas-te nih pen gam khat suah sawmin independent na ngen, Chin hills mi ten British nuai pan suahtak limlim a ut ziau lai takin Shante na navaak, ‘Frontier Areas leh Aung San kisai kei, gam tuam hi ung, Frontier Areas vai ko a area sunga mi ten vaihawm nung’ cihsan.
Tua hangin British kumpi sawlna tawh FAA officer-te makaihin 1947, February kha-in Pinlong khua ah Burma Proper leh Frontier areas gam khat kisuaha independent la ding maw, cih vai kikupna Conference kibawl.
----------
Ka thugelh lui:
1937, April 1 niin India pan Burma tuam din a, Govt. of Burma Act 1935 kici thukhunpi tawh kivaipuak a kipat pah dungzuiin British uk Burma pen dei 4 kisuah hi –
1) Burma Proper (or Ministerial Burma) kici aikeh Legislature of Burma kici hluttaw in a huam khak 'Kawlte gam taktak teng'.
2) Kareni gam kici tulaia Kayah state
3) British-te Hill Station Maymyo, Taunggyi leh adang khua nga.
4) Scheduled Areas (Part One/Excluded Areas ah gam 10, Part Two/Partially Excluded Areas ah gam 3) kici a tomin khamtung gam teng.
Kawlte pen Burma Proper sung bek tawh kisai a, a dang thum pen British-te keptuam vive hi. Burma Proper sungah Kawl ten 1757 kuma a zawh Mon gam, 1784 kuma a zawh Rakhine gam kihel hi. Tua hi keileh Kawlte gam taktak pen Yangon le Mandalay kikal sung teng khawng bek hi phial hi.
Tua hun lai Burma Proper sunga minam min dawk kha ciang pen Burmese/Kawl, Karen/Kayin, Indian/Vai, European/Mikang le Chinese/Sen teng bek hi. Rakhine le Monte pen Kawl tawh biakna (Buddhist) kibang sawnsawn lai ahih manin Kawl tawh kikhen lo uh hi.
Govt. of Burma Act 1935 dungzuia Kawlte hluttaw neih thak - Legislature of Burma pen Senate (seat 36) le House of Representatives (seat 132) ci-in dawl nih kisuah hi. Lower House seat 132 laka seat 91 pen mipite teel (General Seat) theih hi.
J.Thang Lian Pau
Post a Comment