Bang thupi sa i hiam? Sum tampi nei leng thupi a sa om ni. Laitan sangpi zo in degree lukhunel tampi khu leng thupi a sa om ni. Kumpi sungah ulian sem in thuneihna len leng thupi a sa om ni. Galkap tum in bu suak in vandak sa in pau eueu leng nuam a sa, thupi a sa om ni. Gamdang tungin dollar bekbek zeek leng nuam a sa a thupi a sa zong om ni. Zogam mah ah it leh ngaih tawh teng liliai in innkuan ki it in khuasung kikhawl in, nek ding dawn ding kicing peuh leh a lungkim, thupi a sa zong om ni.
Tua ahih leh mailam kum 50 ciang bang thupi i sa tam? Tulaitak bang thupi i sa hiam cih pen tuzawh kum 50 ciang thupi kisa pen nawnlo thei ding hi.
Tuma kum 50 hun in Zomi mi masate gamdang zin in gamdang ah pilna va sin uh a, degree tawh hong ciah uh ciangin na khempeuh a thei dingin kituat hi. Amau bek thupi kisa in a thumuh uh kimuhpih banlo ahih manin kizui zolo a 'kipilsak' ciin kinungthuaplo ahih manin amau bek a pil uh hang minam in i phattuampih ding zah in i phattuampih kei hi. Kumpi nasep ding hong om liamliam in laisiam masa, tan 10 zo masate in nasep ngah in galkap lut theite in bawk leh san tawh hong ciah luapluap uh a, mawtaw Jeep tawh inntual zang hong tuak khiat uh ciangin thupi kisa hi.
Tua zawh deuh ciangin sum leh pai zonna namkhat hong kithupi muh in lamnuai tawn in sumbawl kiuangbawl a, sum lompi tawh inn ciah in zankhat thu in mihau suak in zankhat thu in mawtaw leh taihinn te kinei zo ziau mawk hi. Tuate thupi a sa Zomi tampi takin hahkat taka sum leh pilna zon ding hong nungngat hiaihiai in pheisam man banga hauh theihna lampi hong tawn uh hi. Sum nei leng thuneite sum tawh kilei thei mawk ahih manin pilna neih a thuneih ding a hamsat mahmah lai in sum nei a thuneih zong baihzaw ziau tawh kibang ahih manin sum nung delh in thungpi dim tawh sum va kinawn a pilna sinna sanginnpi leh siamna sinna phualte kinungngatsan kha hi.
Tua khit ciangin mawtaw khatvei tuanga khuapi tun theihna, vanleng khatvei tuanga dollar zeek theihna lampi hong kihong in nu leh pa lamsa nangawn nusia mi khut ah ap in gamdang kitung khiukheu leuleu hi. Gamdang a tung peuhmah lah a tunna gam ah ama pilna leh siamna zah tawh a kituak nasep leh sum muhna na ngah khinlo uh ahih manin a kinungsik bang om kawikawi leuleu a inn lam ah meltheihte hong pai nawnlo dingin vaikhak nuam phial uh hi. A vaikhak takpi a om hangin a pai nailote in 'hong khemna uh hi inteh' ciin utna in nei zaw seem uh ahih manin miksi kua holh bangin hong phul zaw deuhdeuh lai a, lamlak ah a taang tampi om leuleu hi.
Tuzawh kum 50 ciang Zomi te in bang i tuak tam? Bang thupi i sa tam? Bang i delh tam?
Hunlui sung khempeuh ah - pilna thupi a kisak lai in innsung ah kitaihilhna, kithuhilhna, kithumanna zong om hi. Nu leh pa in a tate uh thu hilh in a pi a pute un a tute uh thu hilh hi. A kihilh mah bangin thu zong kimang a, zong kizui hi. Nu leh pate, pi leh pute, uzawte pen tua hun in thuthei pente leh khuamuhna a zai pente hi a a thugen uh zong zuihtak in zong dik a, zong zuihtak hi. Thudik thuman kigen in kihilh uh a, kikhemna leh zuau tawh kilungkimsakna omlo hi. Vaphual lungtang i cih ki itna lungtang takpi tawh kihilhna leh kimakaihna hun hi a, 'nu leh pa thumang a nahlawh pek' ciin mi thumangte a nuntak uh lawhcingin nuamsa uh hi kici hi. Zong diktakpi hi.
Khuasung khat ah innkuan khat a kiten khawm nawnloh ciangin nu leh pate leh tate a kizopna uh hong kitat hiaihiai hi. Nu leh pa in khua ah om in tate mundang ah sangkah in om khia, kumpi nasem in om khia, pilna sinin zinkhia cih bang ahih ciangin nu leh pate thutheih pen a thupi pen leh a thudik pen ahih hangin a khuamuhna uh na toizaw ahih manin tate in nu leh pate sangin theihna, pilna tam hong neizaw ta uh hi. Muhna kibanglo in muhzah kikim nawnlo ahih manin nu leh pate thuhilhna khempeuh tate in zuih ding hong hamsa toto tawh kibang hi. Nu leh pa muhna ah leitung pen a pek hi a, tate sangkahna ah leitung pen a bem na hizen hi! Theihna hong kikim nawnlo ciangin tate in nu leh pa hilh teng bek hong thei nawnlo in laibu pan, thukizakna radio cihte pan thu theihna thumuhna hong behlap uh hi. Tua hun pan in a kikimlo ngaihsutna damdam in hong piang hi.
Tua banga a om ciangin tate thupisak leh nu leh pate thupisak hong kibang nawnlo hi. Nu leh pa in Zomi ngeina banga cihtakna, thumanna, hanciamna, nasep kuhkalna cihte thupi sa uh a, tate in pilna hoihtak zong dingin sum leh pai lam dingin inn leh lo lei ding cih bangin thupi hong sata uh hi. Pilna siamna thupi ahih lam nu leh pate in a theihma in tate in thei uh ahih hang pate, nute thu pen tate leh nauzawte in nial ngeilo ahihna ah ngaihsutna, thupisak hong kibanglo hiaihiai hi.
Mun dang, khua dangah tate sawtpi hong om uh ciangin nu leh pate in a gen batloh uh, a kuppih theih nawnloh uh thu tampi hong pianga - zi neihna, ta neihna, lawm neihna dongin hong kilamdangta hi. Tuate hangin thupisak hong kidang a, zi leh pasal zon dan zong hong kidangta hi. Zomi nu leh pate in a mo ding uh lai siamlua khawng hileh innkuan sung susia ciin deih masa uh hi. Pil lua ding ahih manin a teekte khem in a teekte zahtaklo, a teekte neumuh, a teekte thumanglo, a teekte cih sanga hoihzaw thei cih bangin gimneihta uh hi. Tua manin nu leh pa leh tate thupisak hong kibanglo hi. Zi leh ta ding, mo ding, mak ding deihdan leh thupisakte hong kibatloh ciang ngaihsutna tuamtuam hong piang toto lai hi.
Hun hong pai zel a, nu leh pa in tu mel hong muh uh ciangin a ta leh a tute in leitung pilna hong zongta uh, hong mu ta uh ahih manin khang thum sungah damdam in khang 2na leh 3na ngaihsutna leh deihna, thupisakte hong kihualzaw in khang 1na te thupisakte tawh hong kigamlazaw deuh hi. Hih thute a len thei innkuan leh khua leh tui sungah nawngkaina tawm a, a telsiam paklote phual ah ngaihsutna kibanglo tampi hangin kihodan, kimuhdan zong tampi hong kilamdang hi. Tu laitak Zomi te dinmun ah khang thum kizom diudeu a ngaihsutna kihual leh thupisak kibanga kal suanna mun tampi ah om ta a, a tua hun a tungto pan leh a peel laitak, a kheng khin zong kiomta hi.
Mailam kum 50 ciangin Zomi khempeuh in leitung pilna siamna, thumuhna leh thuzakna - pi leh pu, nu leh pa, tu leh tate khempeuh in hong kikim tading ahih manin tua hun ciangin bangteng thupi i sa laitam cih lunggngaih huai mahmah hi. Bang thupisak in bang thupi bawl in bang thupi sim dingin khangsawnte kihilh lehang hoih ding hiam? Hih thu na ngaihsun ngei hiam? Kei ngaihsutna ah thu pawlkhat ngaihsut mahmah dingin a hoih kasak, pelh theih hilo, a dang khempeuh tawh kizui dinga hoih kasak om a, kong gualsuk ding hi:
1. Mihing pen khat guak kinungta theilo hi. Zomi paunak ah 'singkhuah khat bek kuanglo, suangthu thum loin bel kisuang theilo....' cih bangin i nei hi. Tuate in a gennop pen kuamah a tol teen thei hilo hi hang. A kipawlkhawm a teeng dingte hihang. Mikang pau in 'social being' (a hon a nungta khawm nam) ihi hi. Tua ahih manin Zomi te in mailam ah a lom a nuntak dan mah i zop den ding, khangsawn dongah i kihilh ding leh i nuntak khop liailiai ding ahi hi.
2. Itna, ngaihna, kikhualnate mihing nuntakna ah om ciangin kilawm a, i nuntak nuam in i nuntak manpha hi. Tuate om kei leh mihing pen nasem in anne in lum in a tawpna ah kisi ding hi. Tua ahih manin mihing i hih mah bangin Zomi te zong ki it ding, kingai ding, kikhawl ding, kipawlkhawm ding, kalsuan khawm ding, i nop i dah kiuap ding, i haksat i gentheih kihu tuah ding - tuate a om ciang i nuntakna manpha a, mannei in nuntak nuam ngaungau hi. Tuate kihilh sawn loh a phamawh in ka ngaihsun hi.
3. Bang thupi sa ding i hiam cih limtak ngaihsun in i kihilhsawn ding ahi hi. Zomite in bang thupi sa khawm ding i hiam? Zomite in bang delh ding i hiam? Zomite in bang delh in lung kihual ding i hi hiam? Thupi i sak ding, a thupi, a manpha i makaite in hoihtak in ngaihsun mipite lak ah hong tangko in tua delh, tua sem, tua nuntakpih dingin Zomi bup hong makaih ding uh hi. Pilna maw, siamna maw, sum maw, min leh za maw, cihtakna, thumaanna maw, cih bangin thupi i sak ding leh i minam in i delh ding hong luikhia ding uh hi. Thupi i sak kibangsak ding hanga, zong a thupi takpi leh a hoih takpi mah ahih ding ahi hi. Tu laitak pen sum thupi sa pawl leh pilna thupi a sa pawl cih bangin kikhen laitak hile hang kilawm. Pilna lam kineh kik zaw pian, mate?
4. Vaphual lungtang - itna, cihtakna, kuhkalna, hanciamnate i kihilh tohtoh ding a hoih mahmah bangin pilna leh siamna khangto tawh kituak in i zep tohtoh ding thupi ding hi. A hun zuiin kalsuanzia i khel theih ding a kisap mah bangin a deihna bulpi i mansuah loh ding a thupi ding hi.
5. Zomi khempeuh in leitung kilumlet sungah vai khat peuh hong piang taleh a dingsuak zo ding, a phulsuak thei ding, a palsat zo dingin a kicing pilna, siamna leh theihna a neih nadingin tuni in i kipattah kul hi. Tuate a om leh tuzawh kum 50 pen tomno sungin hong tung dinga, tuate i neih kei leh kum khat sung nangawn sawt sa in i tautau ding hi.
Thukhupna:
Tuma kum 100 hun lai a Galpi 1na hun a sumtang neite thupi a kisak mah bangin tuma kum 50 hun in zong pilna leh siamna thupi kisa to hiaihiai a, tuhun ciangin zong pilna siamna thupi kisa toto lai leh mai lam kum 50 ciangin zong pilna mah thupi kisa toto lai ding ahih manin Zomi khempeuh in pilna mah thupi sim in 'a kicing pilna siamna' neihna dingin siamsinna hahkat in uang bawl semsem leng cih ka deih hi. Itna tawh tua pilna te a zang thei dingin Pasian in Zomi khempeuh hong siamta hen.
Hau Za Cin
Phuitong Liim
www.hauzacin.blogspot.com
He Knows How You Feel
Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.
He is able to run to the cry of those who are being tempted and tested and tried.
Hebrews 2:18 (AMP)
Whatever you are facing, He knows how you feel.
Src: ZomiNam~zominam@yahoogroups.com
Post a Comment