ZOMI NAM NI zong kum 67 bang hong cingketa in a dangkhat in ngaihsunleng I lungsim sungah minam dangte khutsungah I om, minamdangte’ hong ukcip kum 67 hong cingta cih theih ding hong bang leuleu hi. Tulai khangthak pawlkhat te’n Zogam leitang ei a, ahih leh ahih loh tello in Kawlte, vaite khutsung pan a thutang pek ke a, aki pusuah tawmsawm asa zong ki om khatheilai a hih manin ka lungsim sungah hong phawk a beisa thu tampite lak ah thu 7 kong phawksak kik nuam hi.
1. Pinlong Khawmpi: Bang hangin hih khawmpi hong piang hiam, ki bawlhiam cih leh mangkangte khutsung panin kawlte leh ei mualtung mite ki suakta nuamtek ahih manin hih khawmpi hong piangkhia ahi hi. A khat veina Pinlong khawmpi pen 1946 March kha in Shan Sawbwate makaihna tawh ki bawl in ei Zogam sung aom Chin State panin mithum na ki hel uha, Tedim panin ukpi Pu. Pum Za Mang, Hakha ukpi Pu. Kio Mang, Falam ukpi Pu. Hlur Hmung te ahi uh hi. Amau pen tua hunlai tak-in ukpi(Chief) semciat uh ahi hi. A nih veina Pinlong Khawmpi pen 1947 kumin a ngeina mah ah na nei uha, Falam panin ukpi. Pu Hlur Mung, Hakha panin ukpi Pu Kio Mang leh Tedim panin ukpi Pu. Pum Za Mang a cidamlo ahih manin a matang dingin Saizang ukpi Pu. Thawng Za Khup na sawl hi. Hih mun ah thukimna honkhat na neitheita uha, suahtakna ngahzawh ciangin Kawlzang leh Mualtung mite zong a kibangin puahding, nuntakna kikim sakding, kum 10 khitciang atuam tuak a, dingding’ cih bang dan leh a tuamtuam na nei uh hi. Suahtakna I ngahkhitteh Chin Special Division Act tawh I gam hong uk uh a, Kawlte’n lah Pinlong a I kithukimsa, I kamciamsa hong pel in amau khutsungah tuni tan mat leh hen bawlsiatna, nuai netna thuak in mi tampi I om hi. Tua ahih manin mipil mi hangsan tampi in Zogam leitang ngahkik na dingin a nuntakna uh, a sum apai uh na beilawh, na gimlawh na tawllawh uh hi.
2. Bang hang, Kawlte tawh suahtakna ki ngenkhawm sehiam: Ni dangin I minam makaite, kawlte tawh ki pawl in Mangkang kumpite tungah suahtakna a nanget khop uh ana kipawl uh, kawlte khemsa in ana om uh aive maw, haitei uh-ei, ci-in ka mawhsak mahmah ngei hi. Ahi zongin Pu. Tual Khaw Mang genna leh a tuamtuamte genna I etciang in a mawhsakhuai hetlo dan thunih hong musak hi. (1). Amau zong na ut masa hetlo uha, mautam kialpi leh kialpi khatpeuh a tun ciangin Kawlzang panin anntang na lei uh, ann na taw uh ahih manin I utta kei zongin amau tawh ki pawl keileng kialpi khatpeuh I tuahteh gentheilua khaleng ci-in ukpi Pu. Pum Za Mang in mipita ding a lauthawnna leh mipite gilkial dangtakding a khualna hangin na kipawl uh hi. (2) Sept 29, 1932 kumin Ware khua ah Chin Hills Union Organization (CHUO) na phuan uha, mangkang kumpite khut sung panin ngetna pawlkhat nanei uh hi. A piakgen malak un Feb 20, 1938 in a sanzawh loh na uh thu zasak in hih ki pawlna a cimang nading deihtak na hanciamzaw sop uh hi. Tua thu Bogoke Aungsan in a zak ciangin amau zong suahtakna ding a nangen ngeisa ngahlo uh ahih manin bangcileng ka ngahzoding hiam cih a ngaihsutsutlai tak hih thu hong om ahih manin CHUO makaite leh pawlkhat a inn ah samkhawm in Feb 12, 1947 ni-in ki pawlkhawm a, suahtakna ngetding na thukim uh hi. Hih thute I ngaihsut ciangin I makaite tupna pen Mangkang kumpite khutsung panin suahtakna ngahding cih hiphot limlim ahih manin tua suahtakna angah theih nading uh a kalsuanpihnuam, a huhnuam, a pawlpihnuam aom leh ei hileng zong ki utmahmah khalel dingin ka ngaihsun hi. A ngimna a tupna uh taksuak takpi in Jan 4,1948 in Kawlgam in suahtakna ngahin ki pawlna min pen Union of Burma na kipsak uh hi.
3. Bang hangin Falam Khawmpi hong piang hiam: Bang hangin hih khawmpi hong piang hiam cih leh Pinglong ah kawlte leh mualtung mite thukimna aom mah bangin suahtakna mangkang kumpite tungah aki ngetkhopteh suahtakna ki ngah a, suahtakna ngahkhit zawh ciangin U Vuantu Mawng leh Pu. Capt. Mang Tung Nung te’ makaihna tawh Feb 19-22 ,1948 sung Falam ah Khawmpi ki bawl hi. Hih khawmpi pen I gamin Mangkang kumpite khutsung panin suahtakna angah uh lopna leh Kawlte tawh ki pawllai I hih manin Burma Parliament Upper House ah tutna(seat) guk Chin State aitan ading in awng a, tua mun ah ukpite,hausate deih,tel hilo in mipideih mipitelcingte tusakding, mipi tawh mailam kalsuan ziading kikum khawmding cih leh etc, hi hi. Tua hun ah thu tuamtuam kikum uha, gambup in zong suahtakna ngahta ahih manin mangkang kumpite’n 1896 a hong bawlsak uh ki ukna Chin Hills Regulation Act siahtung, siahphei kaihna, tuktha, khaltha lakna leh siah(tax) tawh kisai limlim bang hangin zanglai mawk ding I hi hiam ci-in Tuithang khua pan a pai Pu. Thang Za Kai in thu a sunteh pawlkhat in na thukimpah uha, Mee alak uh leh apai mipi 5000 lak ah mi 17 bek in thukimlo in a tamzaw thamtham in na thukim uh ahih manin tua ni pen Chin Hills Regulation Acts a kiphiat ni, a sih ni zong hong suak hi. Hih Chin Hills Regulation Acts pen Chin State sung bek ah aki zang hilo in Manipur, Nagaland,Sagai Division sunga om Sommra Hills leh tulai tak-a, Mizoram I cih Lushai Hills teng leh a gam tawlam a Cacha Chakma dong ah kizang hi.
4. Zomi Nam Ni ding bang hunin ki khensat: 1950 kum October ni 9 ni-in Chin Affairs Council te makaihna tawh minam ni neih ding kikum uha, a ni dingin Feb 20 kipsak in a kum pen 1948 gambup suahtak kum panin patding in na thukim uh hi. Tua ahih manin Zolai Simbute ah zong F- Feburary 20 ni ZOMI NAM NI HI, ci-in I neulai in Sang inn khawngah I awngke hi. Bang hangin Feb ni 20 na tel uh hiam cih leh ahang pawlkhat in 1918 Feb 20 ni-in Maymyo ah Chin National Education Upgrading cih ki pawlna na phuan uh hi. 1928 Feb 20 ni-in Mindat gam Hlih-yung khua-ah Organization for Chin Hills Unity kiphuan in, 1938 Feb 20 ni-in Kanpalet ah Mangkang galkap makaite tawh gam makaite pawlkhat kimu in a nget uh nam 9 apiak malak un a kipawlna uh susia in makaite na matsawmlai uh ahih manin makai pawlkhat zanpi in Kanpalet pan tai 18 ki gamlatna ah tai uh hi. 1939 Feb 20 ni-in Chin National Organization for Unity Makai 9 Mindat ah naman uh hi. Tua ahih manin Feb -20 pen minam ni dingin natel uh, na zang uh hih tuak hi.
5. Banghang in Zomi Nam Ni Kumsim in ki bawllo: 1951 kum Feb 20 ni-in a khatveina lopna Zomi Nam Ni Mindat khua ah ki bawl hi. 1948 kum panin kisim ahih manin tukum in kum 67 aphata hi-in kumsim a, aki bawlnop hangin Kawl galkap kumpi in hong khakzel ahih manin ki bawlzom theilo in khat veivei ki khawlzel hi. A nuai ah atom in enpakleng
1. 1956 kumin Chin Affair makai Pu. Zahrelian in Zomi Nam Ni Feb 20 ni pen ma suahni Dec ni 4 tawh na laihsawm a, kuamah in thukimlo in laihzolo in zong ki bawllo zaw hi.
2. 1966 kum in Kawl galkap migilote ngaihsut piak tawh Chin Special Day cih tawh makai pawlkhat in na laihsawm uha, Col.Putpa makai in a lungkim loh na uh agen uh leh daikik bilbel uh hi.
3. 1985 kum in Kawl galkapte vaihawmna mah tawh Chin State Day cih tawh laihsawm leuleu uha, Chin State min pen 1973 kum a kingah hipan ahih manin piangtheilo leuleu hi. Zomi Nam Ni cih zatding Kawl galkap kumpi te’n deihlo mawk uh ahih manin hih tawh kisai Kawlgamsung mun tuamtuam ah buaizel hi. Tu-in gam 2,3 na aom te’n a min sit taktak pen mah tawh bawlthei zangthei I hih manin uaikai hetlo in lawptak in I omom na mun ah I nasep khawlliang a I zatding thupi mahmah hi.
6. Bang hangin Zomi Nam Niteh Vaphual kizangh hiam: A ki lawmsakna, a zepna, a mel ahoih man hilo hi. I minam ciaptehna ahi hi. Mi nam picing, minam kician peuhmah in minam ciaptehna na neiciat uh hi. Bang hangin Zomi te’n Vaphual minam ciaptehna in nanei uh hiam? Vaphual nupa ki itna lian mahmah, ki itngiat, khat a sih leh ki sihpih ngiat, nupa kal ciampello, palhngulhlo, zuaugen kikhem cih bang om ngeilo, thuman citak ngiat uha, ei Zomi I pu I pate zong Vaphual mah bangin aki itngiat, a citak ngiat, a thuman ngiat, gal le sa mai ah aki taisanlo, liam le bai, nat le sat khat tuak leh kitai sanlo in ahih theihtawp suah in vahuh, va panpih, khat a sih leh zong ka sih leh kasih ci-in a phula ngiat etc, ana hi uh ahih manin I minam ciapteh na in VAPHUAL a nazat uh ahi hi. Tuni-in tuaci bang lungsim na neihkei leh ZOMI sit na hikei khadinga, Zomi sit na ut leh na pianthak kul masa khading hi. I minam kiciaptehna VAPHUAL ahih manin Vaphualte nuntak khuasakzia zuai-a, Sia. Job Thawngno genmah bangin Pengpelep leh Thangkikte khawng tawh I minam ciaptehna I khek loh ding, a maute hisamlo I hih manin tuate I batkhak loh ding ZOMI NAM NI I bawlsim I kiphawk sak nuam hi.
7. Zogam leh Kawlgam atuam tuak hi: I Zogam pen gamkek Mangkangte hong ukma in ei leh ei aki uk minam leh gam I hi hi. Zogam pen I pu I pa tenma, satma in mihing akici peuhmah nateng ngeilo, na khuasa ngeilo uh ahih manin ki ukna ki sukkhel ki tokhel in gamlim leh leitang laikung laidal tawh a utut un suksuaih tosuaihta le uh eima gam, eima leitang, eima neihsa mah ahi hi. Bang hang hiam cih leh a mite ki nawlkhin in, aki nuainet zongin tua leitang pen kikhin ngeilo hi. Zogam leitang ah I pu I pate zu le sa tawh nuamsa in ana omlai tak uh leitung galpi in hong nawk in Mangkang te’n leitungbup a lak uhteh Zogam leh Kawlgam zong hong nawkkha, hong uk kha uh hi. Kawlgam pen Ministerial Burma ci-in na ciamteh uha, Zogam leh mualtung mite tenna gam pawlkhat pen Frontier Areas Administration ci-in nam nih in hong khentuam, hong uktuam lian uh hi. A mite nuntak khuasak zia, ngeina tawndan duhdan annhuan mehhuan dan nangawn ki banglo hi. Tuhunteh mi pawlkhat in Kawlte ukna sungah leitung pian a kipan aomsa kisa leh bang hangin gamthak satsawm I hi hiam, cih a ngaihsut ki omthei I hih manin tua bang I om khak loh na dingin aki phawksak I hi hi.
Tua ahih manin a beisa mah bangin Zogam pen Zomite mah in uk a, suaktatak in a nuntak na dinguh a lunggulh luat manun ZNC/ZCD panin Sitni.Pu. Cin Sian Thang leh a lawmte pawlkhat in Kawl galkap kumpite mat le hen vuak le sat, bawlsiatna, thongkhiatna cih bang atuamtuam thuakta leh a sun a zan cilo in tuni tan I gam le I minam ading in na nasem uh hi. Sum le pai, innhoih lohoih, mawtaw hoih leh a tuamtuamte tawh kizolta leh ka Zogam leitang suahtakna ding leh ka Zomipihta ding ci-in leitungnop sakna, minthangnate sangin a gam le amipihta ding a nuntakna lungtang a khawlmateng na sepsawm hi. India gam ki ukna huamsung a omte in zong, ahih theihna zah uh itsitlo in Pu. Thang Lian Pau leh a seppih ZRO/ZRA, Zomi Council, ZYA etc, te’n khua-ul, sisan luangta leh zong phamawh salo in nasem den uh hi. Pu. Thang Lian Pau bang a zi a tate tawh zong omman mello in gamsung ah omden zawmahlai hi. Zeisu in ka nung hong zuinuampeuh mah in a zi ata, a innkuanpihte nunsia hen, acih bang hong phawksak hi. Zogam leitang ngahkik nading a, na asem a damlai I makaite’ zotangbang hong damin akhan uh kumkhua sawt hen. Hong nusia khin Pu. Tun Kho Pum leh a kaihzatamte a kipan Pu. Thual Zen leh a lawmte zong I phawk hi. Zomi Nam Ni I bawlsim in gam le minam ading a, aki piakhia mi hangsante mangngilh kei ni.
F - February 20 Zomi Nam Ni hi, cih tawh na khawllo in G- Gam ading nasem ding cih in na zompah a, simsuakleng a tawpna ah Z-Zomite hanglungciam khangtodiam! Cih tawh na khawl hi. Hih thute I ngaihsutteh Zomi Nam Ni ah I gam leh I minam khantohna ding thu le la kikum in ki thutuaktak in I gam leh I minam ading I sepkhop nak leh I gam le I minam hong khangtoding hi, cih hong phawksak, hong musak hi. Tuaci bangin Zomi Nam Ni a bawlkhim theiding in Topa’n leitungbup aom Zosuantate thupha hong piakimciatta hen. Zomi Nam Ni damsawt hen. Hong pai ou, Zomi Nam Ni Ah Kimu Ni.
Khaibawi
Laisimte:
1. Prof. C. Thang Za Tuan; Zomi Nam Ni hong piankhiatna
2. Pu. Chin Sian Thang; Zomi Nam Ni
3. Rev. Dr, Khen Za Sian; Zomi Nam Ni
4. Tg. Vungh Za Pau; Zomi Nam Ni Hong Piankhiatna
5. Capt. Mang Tung Nung; A 7 VEINA ZOMI NAM NI, TEDIM KHUAPI AH\
6. Pu. J. Thang Lian Pau; F- February 20 ni ZOMI NAM NI HI.
7. Dr. Vumson; Zo History
8. Rev. Khup Za Go; Zo Chronicle
9. Salai.Kee Ke Awm; A BRIEF BACKGROUND HISTORY OF CHIN NATIONAL DAY
1. Pinlong Khawmpi: Bang hangin hih khawmpi hong piang hiam, ki bawlhiam cih leh mangkangte khutsung panin kawlte leh ei mualtung mite ki suakta nuamtek ahih manin hih khawmpi hong piangkhia ahi hi. A khat veina Pinlong khawmpi pen 1946 March kha in Shan Sawbwate makaihna tawh ki bawl in ei Zogam sung aom Chin State panin mithum na ki hel uha, Tedim panin ukpi Pu. Pum Za Mang, Hakha ukpi Pu. Kio Mang, Falam ukpi Pu. Hlur Hmung te ahi uh hi. Amau pen tua hunlai tak-in ukpi(Chief) semciat uh ahi hi. A nih veina Pinlong Khawmpi pen 1947 kumin a ngeina mah ah na nei uha, Falam panin ukpi. Pu Hlur Mung, Hakha panin ukpi Pu Kio Mang leh Tedim panin ukpi Pu. Pum Za Mang a cidamlo ahih manin a matang dingin Saizang ukpi Pu. Thawng Za Khup na sawl hi. Hih mun ah thukimna honkhat na neitheita uha, suahtakna ngahzawh ciangin Kawlzang leh Mualtung mite zong a kibangin puahding, nuntakna kikim sakding, kum 10 khitciang atuam tuak a, dingding’ cih bang dan leh a tuamtuam na nei uh hi. Suahtakna I ngahkhitteh Chin Special Division Act tawh I gam hong uk uh a, Kawlte’n lah Pinlong a I kithukimsa, I kamciamsa hong pel in amau khutsungah tuni tan mat leh hen bawlsiatna, nuai netna thuak in mi tampi I om hi. Tua ahih manin mipil mi hangsan tampi in Zogam leitang ngahkik na dingin a nuntakna uh, a sum apai uh na beilawh, na gimlawh na tawllawh uh hi.
2. Bang hang, Kawlte tawh suahtakna ki ngenkhawm sehiam: Ni dangin I minam makaite, kawlte tawh ki pawl in Mangkang kumpite tungah suahtakna a nanget khop uh ana kipawl uh, kawlte khemsa in ana om uh aive maw, haitei uh-ei, ci-in ka mawhsak mahmah ngei hi. Ahi zongin Pu. Tual Khaw Mang genna leh a tuamtuamte genna I etciang in a mawhsakhuai hetlo dan thunih hong musak hi. (1). Amau zong na ut masa hetlo uha, mautam kialpi leh kialpi khatpeuh a tun ciangin Kawlzang panin anntang na lei uh, ann na taw uh ahih manin I utta kei zongin amau tawh ki pawl keileng kialpi khatpeuh I tuahteh gentheilua khaleng ci-in ukpi Pu. Pum Za Mang in mipita ding a lauthawnna leh mipite gilkial dangtakding a khualna hangin na kipawl uh hi. (2) Sept 29, 1932 kumin Ware khua ah Chin Hills Union Organization (CHUO) na phuan uha, mangkang kumpite khut sung panin ngetna pawlkhat nanei uh hi. A piakgen malak un Feb 20, 1938 in a sanzawh loh na uh thu zasak in hih ki pawlna a cimang nading deihtak na hanciamzaw sop uh hi. Tua thu Bogoke Aungsan in a zak ciangin amau zong suahtakna ding a nangen ngeisa ngahlo uh ahih manin bangcileng ka ngahzoding hiam cih a ngaihsutsutlai tak hih thu hong om ahih manin CHUO makaite leh pawlkhat a inn ah samkhawm in Feb 12, 1947 ni-in ki pawlkhawm a, suahtakna ngetding na thukim uh hi. Hih thute I ngaihsut ciangin I makaite tupna pen Mangkang kumpite khutsung panin suahtakna ngahding cih hiphot limlim ahih manin tua suahtakna angah theih nading uh a kalsuanpihnuam, a huhnuam, a pawlpihnuam aom leh ei hileng zong ki utmahmah khalel dingin ka ngaihsun hi. A ngimna a tupna uh taksuak takpi in Jan 4,1948 in Kawlgam in suahtakna ngahin ki pawlna min pen Union of Burma na kipsak uh hi.
3. Bang hangin Falam Khawmpi hong piang hiam: Bang hangin hih khawmpi hong piang hiam cih leh Pinglong ah kawlte leh mualtung mite thukimna aom mah bangin suahtakna mangkang kumpite tungah aki ngetkhopteh suahtakna ki ngah a, suahtakna ngahkhit zawh ciangin U Vuantu Mawng leh Pu. Capt. Mang Tung Nung te’ makaihna tawh Feb 19-22 ,1948 sung Falam ah Khawmpi ki bawl hi. Hih khawmpi pen I gamin Mangkang kumpite khutsung panin suahtakna angah uh lopna leh Kawlte tawh ki pawllai I hih manin Burma Parliament Upper House ah tutna(seat) guk Chin State aitan ading in awng a, tua mun ah ukpite,hausate deih,tel hilo in mipideih mipitelcingte tusakding, mipi tawh mailam kalsuan ziading kikum khawmding cih leh etc, hi hi. Tua hun ah thu tuamtuam kikum uha, gambup in zong suahtakna ngahta ahih manin mangkang kumpite’n 1896 a hong bawlsak uh ki ukna Chin Hills Regulation Act siahtung, siahphei kaihna, tuktha, khaltha lakna leh siah(tax) tawh kisai limlim bang hangin zanglai mawk ding I hi hiam ci-in Tuithang khua pan a pai Pu. Thang Za Kai in thu a sunteh pawlkhat in na thukimpah uha, Mee alak uh leh apai mipi 5000 lak ah mi 17 bek in thukimlo in a tamzaw thamtham in na thukim uh ahih manin tua ni pen Chin Hills Regulation Acts a kiphiat ni, a sih ni zong hong suak hi. Hih Chin Hills Regulation Acts pen Chin State sung bek ah aki zang hilo in Manipur, Nagaland,Sagai Division sunga om Sommra Hills leh tulai tak-a, Mizoram I cih Lushai Hills teng leh a gam tawlam a Cacha Chakma dong ah kizang hi.
4. Zomi Nam Ni ding bang hunin ki khensat: 1950 kum October ni 9 ni-in Chin Affairs Council te makaihna tawh minam ni neih ding kikum uha, a ni dingin Feb 20 kipsak in a kum pen 1948 gambup suahtak kum panin patding in na thukim uh hi. Tua ahih manin Zolai Simbute ah zong F- Feburary 20 ni ZOMI NAM NI HI, ci-in I neulai in Sang inn khawngah I awngke hi. Bang hangin Feb ni 20 na tel uh hiam cih leh ahang pawlkhat in 1918 Feb 20 ni-in Maymyo ah Chin National Education Upgrading cih ki pawlna na phuan uh hi. 1928 Feb 20 ni-in Mindat gam Hlih-yung khua-ah Organization for Chin Hills Unity kiphuan in, 1938 Feb 20 ni-in Kanpalet ah Mangkang galkap makaite tawh gam makaite pawlkhat kimu in a nget uh nam 9 apiak malak un a kipawlna uh susia in makaite na matsawmlai uh ahih manin makai pawlkhat zanpi in Kanpalet pan tai 18 ki gamlatna ah tai uh hi. 1939 Feb 20 ni-in Chin National Organization for Unity Makai 9 Mindat ah naman uh hi. Tua ahih manin Feb -20 pen minam ni dingin natel uh, na zang uh hih tuak hi.
5. Banghang in Zomi Nam Ni Kumsim in ki bawllo: 1951 kum Feb 20 ni-in a khatveina lopna Zomi Nam Ni Mindat khua ah ki bawl hi. 1948 kum panin kisim ahih manin tukum in kum 67 aphata hi-in kumsim a, aki bawlnop hangin Kawl galkap kumpi in hong khakzel ahih manin ki bawlzom theilo in khat veivei ki khawlzel hi. A nuai ah atom in enpakleng
1. 1956 kumin Chin Affair makai Pu. Zahrelian in Zomi Nam Ni Feb 20 ni pen ma suahni Dec ni 4 tawh na laihsawm a, kuamah in thukimlo in laihzolo in zong ki bawllo zaw hi.
2. 1966 kum in Kawl galkap migilote ngaihsut piak tawh Chin Special Day cih tawh makai pawlkhat in na laihsawm uha, Col.Putpa makai in a lungkim loh na uh agen uh leh daikik bilbel uh hi.
3. 1985 kum in Kawl galkapte vaihawmna mah tawh Chin State Day cih tawh laihsawm leuleu uha, Chin State min pen 1973 kum a kingah hipan ahih manin piangtheilo leuleu hi. Zomi Nam Ni cih zatding Kawl galkap kumpi te’n deihlo mawk uh ahih manin hih tawh kisai Kawlgamsung mun tuamtuam ah buaizel hi. Tu-in gam 2,3 na aom te’n a min sit taktak pen mah tawh bawlthei zangthei I hih manin uaikai hetlo in lawptak in I omom na mun ah I nasep khawlliang a I zatding thupi mahmah hi.
6. Bang hangin Zomi Nam Niteh Vaphual kizangh hiam: A ki lawmsakna, a zepna, a mel ahoih man hilo hi. I minam ciaptehna ahi hi. Mi nam picing, minam kician peuhmah in minam ciaptehna na neiciat uh hi. Bang hangin Zomi te’n Vaphual minam ciaptehna in nanei uh hiam? Vaphual nupa ki itna lian mahmah, ki itngiat, khat a sih leh ki sihpih ngiat, nupa kal ciampello, palhngulhlo, zuaugen kikhem cih bang om ngeilo, thuman citak ngiat uha, ei Zomi I pu I pate zong Vaphual mah bangin aki itngiat, a citak ngiat, a thuman ngiat, gal le sa mai ah aki taisanlo, liam le bai, nat le sat khat tuak leh kitai sanlo in ahih theihtawp suah in vahuh, va panpih, khat a sih leh zong ka sih leh kasih ci-in a phula ngiat etc, ana hi uh ahih manin I minam ciapteh na in VAPHUAL a nazat uh ahi hi. Tuni-in tuaci bang lungsim na neihkei leh ZOMI sit na hikei khadinga, Zomi sit na ut leh na pianthak kul masa khading hi. I minam kiciaptehna VAPHUAL ahih manin Vaphualte nuntak khuasakzia zuai-a, Sia. Job Thawngno genmah bangin Pengpelep leh Thangkikte khawng tawh I minam ciaptehna I khek loh ding, a maute hisamlo I hih manin tuate I batkhak loh ding ZOMI NAM NI I bawlsim I kiphawk sak nuam hi.
7. Zogam leh Kawlgam atuam tuak hi: I Zogam pen gamkek Mangkangte hong ukma in ei leh ei aki uk minam leh gam I hi hi. Zogam pen I pu I pa tenma, satma in mihing akici peuhmah nateng ngeilo, na khuasa ngeilo uh ahih manin ki ukna ki sukkhel ki tokhel in gamlim leh leitang laikung laidal tawh a utut un suksuaih tosuaihta le uh eima gam, eima leitang, eima neihsa mah ahi hi. Bang hang hiam cih leh a mite ki nawlkhin in, aki nuainet zongin tua leitang pen kikhin ngeilo hi. Zogam leitang ah I pu I pate zu le sa tawh nuamsa in ana omlai tak uh leitung galpi in hong nawk in Mangkang te’n leitungbup a lak uhteh Zogam leh Kawlgam zong hong nawkkha, hong uk kha uh hi. Kawlgam pen Ministerial Burma ci-in na ciamteh uha, Zogam leh mualtung mite tenna gam pawlkhat pen Frontier Areas Administration ci-in nam nih in hong khentuam, hong uktuam lian uh hi. A mite nuntak khuasak zia, ngeina tawndan duhdan annhuan mehhuan dan nangawn ki banglo hi. Tuhunteh mi pawlkhat in Kawlte ukna sungah leitung pian a kipan aomsa kisa leh bang hangin gamthak satsawm I hi hiam, cih a ngaihsut ki omthei I hih manin tua bang I om khak loh na dingin aki phawksak I hi hi.
Tua ahih manin a beisa mah bangin Zogam pen Zomite mah in uk a, suaktatak in a nuntak na dinguh a lunggulh luat manun ZNC/ZCD panin Sitni.Pu. Cin Sian Thang leh a lawmte pawlkhat in Kawl galkap kumpite mat le hen vuak le sat, bawlsiatna, thongkhiatna cih bang atuamtuam thuakta leh a sun a zan cilo in tuni tan I gam le I minam ading in na nasem uh hi. Sum le pai, innhoih lohoih, mawtaw hoih leh a tuamtuamte tawh kizolta leh ka Zogam leitang suahtakna ding leh ka Zomipihta ding ci-in leitungnop sakna, minthangnate sangin a gam le amipihta ding a nuntakna lungtang a khawlmateng na sepsawm hi. India gam ki ukna huamsung a omte in zong, ahih theihna zah uh itsitlo in Pu. Thang Lian Pau leh a seppih ZRO/ZRA, Zomi Council, ZYA etc, te’n khua-ul, sisan luangta leh zong phamawh salo in nasem den uh hi. Pu. Thang Lian Pau bang a zi a tate tawh zong omman mello in gamsung ah omden zawmahlai hi. Zeisu in ka nung hong zuinuampeuh mah in a zi ata, a innkuanpihte nunsia hen, acih bang hong phawksak hi. Zogam leitang ngahkik nading a, na asem a damlai I makaite’ zotangbang hong damin akhan uh kumkhua sawt hen. Hong nusia khin Pu. Tun Kho Pum leh a kaihzatamte a kipan Pu. Thual Zen leh a lawmte zong I phawk hi. Zomi Nam Ni I bawlsim in gam le minam ading a, aki piakhia mi hangsante mangngilh kei ni.
F - February 20 Zomi Nam Ni hi, cih tawh na khawllo in G- Gam ading nasem ding cih in na zompah a, simsuakleng a tawpna ah Z-Zomite hanglungciam khangtodiam! Cih tawh na khawl hi. Hih thute I ngaihsutteh Zomi Nam Ni ah I gam leh I minam khantohna ding thu le la kikum in ki thutuaktak in I gam leh I minam ading I sepkhop nak leh I gam le I minam hong khangtoding hi, cih hong phawksak, hong musak hi. Tuaci bangin Zomi Nam Ni a bawlkhim theiding in Topa’n leitungbup aom Zosuantate thupha hong piakimciatta hen. Zomi Nam Ni damsawt hen. Hong pai ou, Zomi Nam Ni Ah Kimu Ni.
Khaibawi
Laisimte:
1. Prof. C. Thang Za Tuan; Zomi Nam Ni hong piankhiatna
2. Pu. Chin Sian Thang; Zomi Nam Ni
3. Rev. Dr, Khen Za Sian; Zomi Nam Ni
4. Tg. Vungh Za Pau; Zomi Nam Ni Hong Piankhiatna
5. Capt. Mang Tung Nung; A 7 VEINA ZOMI NAM NI, TEDIM KHUAPI AH\
6. Pu. J. Thang Lian Pau; F- February 20 ni ZOMI NAM NI HI.
7. Dr. Vumson; Zo History
8. Rev. Khup Za Go; Zo Chronicle
9. Salai.Kee Ke Awm; A BRIEF BACKGROUND HISTORY OF CHIN NATIONAL DAY
Post a Comment