Agelh ~ Lian Muan Kim
Kiniam khiatna icih pen Greek kam in ―tapeinos‖ – niam, cih leh ―phronesis‖ – lungsim, ahih kei leh ngaihsut zia cih kammal tegel a kigawm hi a, ―tapeinophronesis - lungsim niamkhiat cihna ahi hi. Thuciam Lui Greek kama a kitei kikna ahi Septuagint ah hih kammal pen 67 vei kihel a, kunsuk, kiniamsak, kiniam khiat cih bangin kizang hi. Thuciam Thak sungah 19 vei kizang hi.
Kineu sekna in kiniam khiatna hilo hi. Guallehna in zong kiniam khiatna hilo-a kiniam khiatna tawh i gualzawh ding bel Topa deihna ahi hi. Kiniam khiatna icih in Topa hong muh banga ei le ei kimuhna hi-a ihih bangbanga kitheih theihna ahi hi.
Piangthak makai khat pen a kiniam khiat-a leh makai hoih hi khading hi, ci-in i ciamteh theipah hi. Banghang hiam cih leh Laisiangtho sung hi taleh leitung tangthute ah hi taleh makai hoihte kiniam khiat uh hi.
Hih kiniam khiatna pen gamvai tuamtuam leh sumlei sumzuakna tuamtuamte ah zuihhak mahmah hi. A diakdiak in Pasian theilote leh mipil khollote mai bangah kiniam khiat ding haksa phadiak hi. Va kiniam khiat khialkha vanglak le hang hong tuancil ding hipah le uh kilawm phial hi. Bangbang hi taleh piangthak maikai te in zuau kihel lo, launa kihel lo, Pasian mai leh mite mai ah kiniam khiat in i hihna taktak i ki mangngilh het loh ding thupi hi. Tua ban-ah, mite in na kiniam khiatna hangin hong simmawh hong neu-et khakphial uh hangin zong a thupi pen ahi Topa pahtaakna na ngah ding hi.
Topa Zeisu ngaihsun in. Pasian takpi kiniam khiat in mi bangin hong piang hi. Ka vangliatna te len tentan ning cilo in hong kiniam khiat hi. A Pasian hihna a utbang in zang ziahziah lo-a, Pa Pasian deihna bangin gamta zaw hi (Phil 2). Tua ban-ah: Kiniam khiatna omlo in gupkhiatna omlo hi, na ci lai hi (Matt 18:3-4). A nungzuite' khe a silsak zong ngaihsut huai sa ing. D. L. Moody in: Pasian mai ah na kiniam khiat kei-a, na mawhna te na kisikkik kei leh hehpihna hanga upna tawh gupna a ngah mawhneite bek ih luttheihna vantung kong khakpi nang a dingin kihong ngeilo ding hi, ci hi.
Numei sung pan a piangngei khempeuh lak ah mi thupi pen dinga kiciamteh ahi tuiphum pa Zawhang in: Zeisu Khazih ahih leh khang semsem dinga, kei kakiam semsem ding hi, ci hi (Zawhang 3:30). Mi kiniam khiat taktak ahihna kilang hi.
Maikai khat pen a picinna, a khami na leh a khantoh semsem na tawh kizui in kiniam khiat semsem ding hi. Pawlu nuntakna en lehang Pasian nasep a kipat tung lampian in: Nungzuipite lak ah neupen ka hih manin nungzuipi hong kicih ding zong ka kilawm kei hi, ci hi (Kawlentu masa 15:9). A picin zawk ciangin: Pasian mi a neupen sangin zong ka neuzaw hi, na ci leuleu hi (Eph 3:8). A sihkuan ciangin bel: Mawhneite lak ah a lianpen ka hi (Tim masa 1:15), ci ahih manin khami semsem kiniam khiat semsem ahih lam i telthei hi.
John Wesley le George Whitefield pen hunkhat sunga Pasian nasem minthang mahmah tuak ahi uh hi. Ahih hangin a upna uh kibang hetlo se hi. Tua a thei gige nupi khat hong pai in Wesley kiangah: Wesley aw, vantung gam ah Whitefield na mu dia, ci-in a vadot leh Wesley in: Mu kei mai ning, ci hi. Nupi nu in: Whitefield vantung gam tunglo ding maw, ci-in a dotkik leh Wesley in: Whitefield bel Pasian tokhom kiangah tukha in cin, kei bel a nunggual lam pek ah tukha ding ka hih manin amah muzo kei ning, ci-in dawng hi. Hih makai pa kiniam khiatna lamdang sa ing!
Billy Graham a nasepna ah Pasian in zang mahmah in thupha pia ahih manin mi tampi in a pawlpih zah khat un, mi tampi mah in gensia hi. Khat vei, a kampau khat pen mi zawngte a dingin hoih kisa phalo ahih manin kilim gensiat mahmah hi. A diakdiak in laibu gelh khat in gensia hi. Tua leh Billy in zong tua laibu gelh pa laikhak in: Lawm aw, khial kha mah ing. Hehpihna tawh hong maisak in la, kul nasak le zong na ut bangbang in dan hongpia in, ci hi. Billy na sepna ah a gualzawhna thupi pen khat in a kiniam khiana ahi hi.
A si masa puantuam tang, a masa peuh hampha zaw, ci-in paunak i nei hi. Tua ahih manin mihingte pen a nihna ki-utlo hi. Makai bek ut in nungzui ki-utlo hi. 1969 kum in America-te Khapi tung’ tung uh hi. Tuak khia-a Khapi maitang a siksuk masa ding pen Neil Amstrong hilo in a lawmpa Buzz Aldrin ding hi zaw hi. Ahih hangin hih theihlohna khat tawh Amstrong hong kumsuk masa hi. Aldrin lungkim zo mahmah lo hi. A nihna ki-ut hetlo hi. Banghang hiam cih leh kiminthang nuam tek a, kihampha nuam tek hi. Tua ahih manin kiniam khiat ding haksa kisa tek hi.
Makai hoih khat ahi Sawlu tapa Jonathan thupi sa mahmah ing. A lawm itpa Davuih pen a tutna awn in: Kei a nihna hong hisak in (Samuel masa 23:17), ci-in Davuih kiangah ngen zawsop hi. Nang a nihna hong hi in ci phial lezong khial lo hi. Amah kumpipa' tapa hi-a, a pa' tokhom a luah ding ngeina hi. Ama khanggui zong kumpi khanggui ding hi. A thahat, a pilvang, makai siam khat mah hi a, mite' pahtawina, thupi sakna, minphatna leh lapsangna te zong deihlo tuan lo ding hi. Ahih hangin a lawmpa sangkhan in amah kiniam khiat hi.
Piangthak makai khat pen bang hangin kiniam khiat kul sese hiam cih leh amah pen sila makai ahih man hi. Makai dangte tawh kibang theilo hi. Makai dangte ahih uh le bel a tung uah kuamah om nawnlo in a lian pen hipah lel uh a, thuneihna khempeuh zong amau khut sungah om hi. Ahih hangin piangthak makai khat pen tua bang hilo hi. To khat kinei dena tua Topa cih bangbanga a kigamta ahi hi. Ahih hangin a phawkhuai thu khat in Topa sila makai suahna pen hamphatna lian pen khat hi. Hih kammal kizatna peuhpeuh ah a khiatna in kumpite' nasem cihna hi dena angtan huai mahmah hi. Bangbang hita leh sila makai hi veve ahih manin kiniam khiat tawntung ding mah thupi pen hi. A kiniam khiat Topa' nung a kizui ahih manin tua nungzuite zong kiniam khiat loh phamawh hi.
Makai hoih in thuneihna zang masa lo a, piakhia masa hi. Tutna sang la masa lo a, panmun la masa hi. Nungzuite thupia masa lo a, thuzawh masa hi. Nate thupi sak masa lo a, mipite mah thupi sak masa hi. Mipite makaih ding leh amau a dinga nungta ahih lam kiphawk ahih manin mipite a ding, tuni bang semthei ding ka hiam cih tawh zingtho hi.
Tua ahih leh sila makai khat in bangci bangin nungzuite tungah thu nei thei ding ahi hiam. Kiniam khiat thapaai leh kuan zahtak dinga kuan ama thu mang ding hiam, ci-in dotna tuamtuam hong ompah lian hi. Ahih hangin hih dotna pen Kawlentu nihna 4:5 in hoihtak in dawngkik ziau hi. Sila makaite pen thudang hang hilo, Zeisu hanga Ama ading bekin sila makai a suak ahi uh hi. Zeisu sila hi in mite' sila hi masa lo uh hi. Sila makai in mipite ading in sila hi-a, amau deihna peuhpeuh zuih nading in sila hilo hi. Sila makai in midangte tungah Zeisu deihnate a tangtung sak dinga piang ahi hi. Tua Zeisu deihnate in:
Pasian' minthan na ding (Zawhang 17:4)
Hoihtaka biakpiak theih na ding (Matt 21:12-17; Zaw-hang 2:13-22; 4:24)
Kikhal theih na ding (Matt 28:16-20; Maku 1:16,17)
Sawlna lianpi man na ding (Matt 28:16-20; Maku 16:14, 15)
A pukkik piangthakte phot-toh na ding (Matt 18:15, 16)
Mawhna pholaak na ding (Matt 18:15-20)
Zaa neih na dinga kituhte taai nading (Maku 10:43-45)
Nupa kilungtuak a kikhen loh na ding leh (Matt 5:31, 32; 19:3-12)
Makaihna ah thuneih na ding, cihte ahi hi (Matt 18:18-20; 28:20; Zawhang 20:21-23; Maku 6:7).
Hih a tunga teng i muhkhit ciangin sila makai khat in makaihna maan a neih theih na dingin thuneih na tawh na asep ding leh a nuntak pih takpi ding kisam hi. Thuneihna i cih ciangin leitung makai dangte banga thuneihna a gen ihi kei a, Zeisu deihna tawh kituak a thuneihna a gen nuam ihi zaw hi. Pawlpi le kipawlna tuamtuam a khantoh na ding le Pasian minthan na ding ahih leh makai khat in thuneihna a zat ding zong kisam hi. Tua thuneihna pen ama aa hilo-a Pasian kiang pan hongpai thuneihna hi ding hi.
Endnotes
1) Neil Amstrong pen August 5, 1930 in Wapakoneta, Ohio ah suaka, Khapi a sikkha masa pen pa ahi hi. Khapi tung a kah ma in US tui galkap vanleng hawl khat hi a, Korea gal zong kuanngei hi. Mipil miciim mahmah khat ahih manin galkap sungah a om lai ahi zongin Khapi tung a tun khit ciang ahi zongin pahtakna minpha tampi tak ngah hi. 1966 kum in Gemini 8 tawh penglam huihkhua ah khat vei leng a, 1969 ciangin Apollo 11 tawh khat vei leng leuleu in July 20 ni in Khapi tung tung uh hi. Khapi tungah nai 2 val khawng a om khit uh ciangin leitung hong lengkik uh hi.
2) Buzz Aldrin pen January 20, 1930 in Glen Ridge, New Jersey ah suaka, Khapi tung a sikkha nihna ahi hi. A min taktak pen Edwin Eugene Aldrin hi na pi, a neu lai un a sanggam nu in brother a cih ding pen ci thei lo in buzzer ci kha ahih manin tua pana kipan Buzz a kici suak ahi hi. US vanleng galkap khat hi a, Massachusetts Institute of Technology pan in Doctor of Science zong ngah hi. 1963 in Gemini 12 tawh penglam huihkhua khatvei va zin a, Apollo 11 tawh July 20, 1969 in Khapi tung’ tung hi. Sang tuamtuam ah zong laihilh in penglam huihkhua khualzinna tawh kisai zong tampi zon beh hi. Minphat na leh pahtawina tampi mah ngah a, President Bush tawh zong kilawmta uh hi.
Source:
Makaih Pilna (Laibu)
Post a Comment