1912 kum-a Atlantic Tuipi sunga a kia Titanic Tembawpi thu kithei nuam tek mahmah hi.
June 17 ni-in OceanGate CEO Stuckton Rush le a passenger mi 4 te in zong Titanic thu kan ding hong kipan uh hi. Passenger khat zuih man US$ 250,000!
Suakta takin penglam vankhua kan ding pen Stuckton Rush in a neutung akipan tup le ngima a neih ahi hi. Hong hanciam mahmah-a a kingah pakpak zo lo commercial pilot's license pen kum 18 a phakin ngah hi. Leitungah hih bang-a vanleng hawl theihna laisen a ngahte lakah a naupang penin kiciamteh hi. Van lam tawh kisai engineering a zawh khit ciangin "Mars tungah a tung masa pen hi nuam ing," ci ngiat hi. A hanciam mahmah hangin a mit hoih lo citciat ahi manin, van lam sangin tuipi sung lam kan ding hong sawm hi.
Stockton Rush in 2009 kumin OceanGate kici tuipi sung khualzinna company khat hong pankhia-a, CEO sem pah hi. 2021 kum akipan tui sunglut tembaw 3 tawh tuipi sung khualzinna hong kipan-a, sum zong tampi ngah hi. Stuckton Rush in tui sunglut tembaw OceanGate Titan hawl ngiat-in, a lawmte 4 tawh June 17, 8:00am pawl in Atlantic Tuipi a thuukna pi 12,000 tuipisual tunga Titanic Tembawpi kan dingin tui sung lut hong kipan uh hi. Tui sung a lut khit uh nai 1 le minute 45 kiim ciangin a kipatkhiatna uh tuipi tunga Tembawpi tawh kithuza thei nawn lo uh hi. Titan tui sunglut tembaw sungah mihing 5te diik ding Oxygen kicing nawn lo ding ahi manin Tembawpi tungate lunghimawh mahmah uhhi. Titan tua hun-a kipan zon pi-in kizonga, June 21 ciangin Titanic tembawpi pan pi 1,600 kiim ah a themthem-in kimukhia hi. Na puakkham-a, a them a neng te a kimuh mawk ciangin a luang a ban uh a kimuh nai loh hangin tua mi 5 te si khin taktak hi cih US tuipi cingte in tangko uh hi.
Tua mi 5 te pen British-te mihau adventurer Hamish Harding (1964-2023), Pakistan te mihau philanthropist Shahzada Dawood (1975-2023) le a tapa Suleman (2004-2023), French te mihau tui siam minthang Titanic Expert Paul-Henri Nargeolet (1946-2023), le OceanGate kici tuipi sung khualzinna company-a CEO Stuckton Rush (1962-2023) te ahi uh hi.
Hih bang accident tuak dingin kilamen dihdih lo ding uh hi. A hanciamna te uh, a pilna a siamna te uh, a hauhna te uh ... "lel dih!" cih ding lo ngal thu dang om kei. Van Gam a tung uh tam maw?
Zeisu in, "Keimah in lampi, thuman thutak le nuntakna ka hi hi. Kei tungtawn loin kuamah in Pa kianga tung thei kei ding hi," a ci hi. John 14:6
Sia Nang Za Thawn
Titanic Submarine tembaw tangthu: 22 Asau na,Pound 23,000 hi-in Oxygen pen ni 4 kikhom ding a kibawl hi.
2009 in Oceangate kipan khia aa
2020 ciang in NASA tawh kipawl in bawl khop ding cih geel uh hi.
2021 March in OceanGate leh NASA leh Dr.Scott Parazynski in zong kong kihel ding ci hi.
July 2021 amasa pen tuisung lut lawhcing ci in apai teng Rush,Scott leh PH Nargeolet in gen khia hi.
November 2021 ciang in OceanGate te in ticket zuak kipan aa ticket khat ciang dollar $250,000 ci uh hi.
August 2022 ciang in OceanGate te in tuisung a titanic tembaw en pai na video khah khia uh hi.
January 2023 OceanGate in mimal 60 leh research bawl mi 15-20 kikal pai sak zo ci uh hi.
May 26, 2023 OceanGate in tweeter ah maan kizaih na mimal 24 atu zumkhan ah caption in tukal pen alawp huai mahmah Mission 2 crew ci uh hi.
June 1, 2023 Tweet leuleu in North Atlantic laizang ah ka om ta uh hi,internet connection zong ka nei uh aa Titanic dive zong success ahih man in #Starlink te tung ah lungdam ung ci hi.
June 15,2023 Tweet leuleu in atung abang mah in gen uh hi.
June 17,2023 Hamish Harding,Chairman in next day planned ci in Fb ah post in gen khia hi
June 18, 2023 zingsang nai 8:00 AM in tuisung ah tuak suk uh aa tuitaw atun dong uh pen nai 2 leh lang asawt ding hi-in,9:45 AM in mothership tawh kizop na ngah lo uh aa minutes 90 tuisung alut zawh uh hi. Nitak nai 3 ciang in a tunto hun ta uh aa bangmah hong suaktoh loh ciang Coast Guard te kiang report pah uh hi.
Tua ni pan azon uh kizom toto in-
June 22, 2023 in lam et ngamloh zah in atuahsiat na uh kimu khia hi,amu masa ahih leh Canada te bawl (Victor 6000) robot camera kithuah tuisung lutsak uh a kithei khia hi,a mite ahih leh lak theih ding omlo ci uh hi,ahang in tembaw puakkham ahih man in asung ateng zong zanmang khin ding ci uh hi.
Hih Company te pen abei sa in zong safety lam gina lo ci in lawsuits kibawl zelzel ci uh hi.
Atuang mimal:
1- Hamish Harding (58) British Businessman
2-Shahzada Dawood (48) Pakistani Investor
3-Suleman Dawood (19) Atapa
4-Paul Henri Nargeolet (77) French Diver
5-OceanGate CEO Stockton Rush (61)
Post a Comment