Update; Manipur Tualgal buaina 3 June, 2023

Core Committee on Separate Administration kiphuan khia -

Manipur a nam lian pen Meitei ten Kuki leh Zomi te hong dona tawh kizui in, a beisa ni 17-18 May 2023 sungin Joint MLA, Innpi leh CSO ten Aizawl, Mizoram ah Meeting thupitak nei uh hi. Hih meeting panin mailam maban leh movement makai dingin “Core Committee on Separate Administration” phuh khiat ding geelna om hi. Hih bang hong pian na dingin Kuki Innpi Manipur (KIM), Zomi Council (ZC) leh ITLF pan palai 2 ciat sawl dingin thukim uh a, Hih palaiten 28, May 2023 in Aizawl ah meeting nei kik uh a, tua panin “Core Committee on Separate Administration” phuhkhiat in hong om hi. Interim Chairman leh Secretary zong guang pah uh a, Aizawl ah Liaison Office hon dingin thukim in, Liaison Officer ding zong guang pah uh hi. 

Kuki Innpi Manipur (KIM), Zomi Council (ZC), Hmar Inpui, Mizo People Convention (MPC) leh ITLF pan palai 2 ciat paikhawm te-in Date 2, June 2023 zingsang nai 11:00 in Mini Auditorium Dorcas Hall New Lamka ah Expansion and Induction Programme nei uh a, Executive Body bawlkhia in vaipuak zong hawm pah uh hi. Vaipuak neite - 

Chairman-Suominthang Doungel, 

Vice Chairman-Hauneilal Vaiphei, 

Vice Chairman (External)-Upa R.Tawna Khawbung, 

Secretary -Thangbiaklian Hangzo, 

Financial Secretary-S. Lianbawi Vaiphei, 

Tresurer-S. Ngaineikim, 

Information and Public Relation- Golan Suanzamung Naulak 

Executive Members -

Rev. Dr. V. Lalnghakthang,

 Lalrinlien Joute leh H. Mangcinkhup 

 Ex-Officio members-

Hmar Inpui, Kuki Innpi Manipur (KIM), Zomi Council, Mizo Peoples Convention leh ITLF pan member 2 ciat kihel ding hi. 

Core Committee on Separate Administration, Expansion leh Portfolio kihawm zawh ciang Pastor MT Khanlal Guite, Local Pastor, EBCC Hebron in makai thakte thupha piakna nei hi. Core Committee on Separate Administration in Regional Office munli ah hong ding hi. Tua te Lamka, Pherzawl, Kanggui, Chandel, Tengnoupal, Va-ngai, Jiribam leh Tamenglong sung pan teelkhiat ding hi. 

Core Committee on Separate Administration in join MLA, Innpi, CSO leh kipawlna tuam tuamte tawh kithuza in nasem ding uh hi. Mipi ten thapia siam ciat dingin ngetna nei uh hi.