Ni 12/01/15 Monday ni sun Zum vai tuamtuam hangin Khuasung kapai a, ka ciahkawm in Canberra Khuapi zinna ding Meileng Letmat kala kawm hi Australia Meileng first class leh second class India lam danin aki bangci lamdan hiam, first class ah ann le tui a mawkna in apia uh hiam, lupna delhphah, lukham, niangtui leh a tuamtuam a mawkna in apia uh hiam, cih a vaisaite ka dot leh bangmah ki pialo hong cih ban-ah aki lamdan luatna om kei hong cih san hi. India leh Kawlgam bangah ki lamdang mahmah mawk ahih manin um zolo in bang aci peuhmah hiam ci-in neilo pipi in first class mah kala teitei hi. A vaisai nu bangin second calss mah lakding in hong deihsak zaw a, Sydney leh Canberra kikal beek second class tawh na paizawding hiam, ci-in hong genliang hi. Vaite bangin hong khemkha leh ci-in first class mah tawh paining kaci veve hi. Meileng dinkhiat hun ding pen nitak nai 10:10pm hi-a, Sunin Pa. Piangpi( President: Zomi Innkuan Queensland) hong zin tawh kituak ahih manin ama kiangah huhna ka ngen a, amah zong guahzu daikaita leh Pasian a zahtakna leh minam a it manin a Mawtaw tawh hong pai a, nitak nai 9:30pm pawl in ka omna inn uh hong tung hi. Kei zong ki thawi pah samsam in ka dingkhia uh hi. Tua ni nitak pen guahzu neknek den mawk a, Meileng khawlna ka tun uhteh ki holim theih dan zong omlo ahih manin nawhsa tak-in ka kikhen mai uh hi.
Meileng pen India leh Kawlgam bang loin ahun ciangtan omsa mah bangin hong tunglian a, kei zong kahto pahin first class leh second class a kilam danna theinuam ka hih manin a sungteng khat le khat kawmin ka en kawikawi hi. Tutna leh ana khempeuh ki bangin first class pen tawmcik siangtho zaw hi. India Meileng pen tutna I ngah nak leh nuamtak in ki lumthei a, first class ahih leh puanza, lukham hong pia in neek le dawn zong leikul nawnlo hi. Australia meileng pen ki lumtheilo a, I tutna tawm awnthei bek in neek le dawn leikul hi. Dawntui bel a mawkna in a nunglam ah om a, a duhte vapai in va dawn ziauziau ahi hi. Sydney zingsang nai 6:59am in ka tungah tua panin Meileng ki khek in nai 12:12pm in Canberra ka zuan uh hi. Canberra Meileng khawlna nitaklam nai 4:29pm in ka tunguh a, Sia.Thangbawite nupa in hong na dawn uh hi. Tua panin amau innlam ka zuanpah vingvengh uh hi. A inn uh ka tun ciangun na nopci peuhmah ban-ah Australia gam pen inn lam dan zong khua khat le khua khat a kibat khit loh lam ka phawk hi. Ahuan uah, maiteh, mehthuk, tangkuangteh, lenmui, manta,nanan leh a tuamtuam nacing uha, I gamlam hong phawksak liang hi. Koikoi ah omtaleng I pianna I gam I lei kingai, kiphawk bek‘ hilo in I nek, I dawn I khankhiat pihte mah kiduh veve ahih lam hong phawksak hi.
Parliament Innpi Hawhna: Ni 14/01/15 Wednesday ni-in kava en uh hi. India a tawh na ki lamdang mahmah a, I utut na mun khempeuh suakta tak-in ki en kawikawi thei hi. A sungah I lut dingteh security te’n hong velphot in I konggak leh I khutbulh naite zong Computer tawh hong velsak phot uh hi. A sungah I ut bangbang in Phone tawh ki pauthei in Maan zong ki puathei ki lathei hi. Coffee zuakna leh neektheih tuamtuam ki zuakna mun zong omin nopci mahmah hi. Sia. Thangbawite nupa tawh ka thum un Coffee dawnin tawlkhat ka tawlnga phot uh hi. Parliament Innpi pen dawl 4 khawng hi-a, a kim pen paknam tuamtuam leh singkung nam tuamtuam tawh kizemin etlawm mahmah a, mun pawlkhat ah lopa dum dide hi. A sung siangtho mahmah in, Inndei tuamtuamte leh gam-uk makai ulian tuamtuamte thu kikupna munte zong va enin lungsim thungetna amau ading leh nikhat niteh Zomite hih mun-ah Zum akah nanguh thungetna ka nei uh hi.
A innkhum pen zaipi zang dide in lopa eng zong mun pawlkhat ah po litlet hi. A tungkhum ah tausangpi khat zong bawl uha, ei mihing pumpi hanciamna bek tawh kikah theih tuaklo hi. A innkhum zang ah zong Austrlia gam makaita ding leh nikhat ni teh khangthak Zomite inntek na mun, vaihawmna mun leh hih mun panin Zogam leh Zomi tampi tak in phattuamna tampi a ngahna dinguh thungetna Nu Pak makaih na tawh ka nei uh hi. Thunget khitteh kaphawk thukhat in US White House ah thungen khat in Pasian in Zomi numei Nu Khan na zanga, Australia Parliament House ah thungen khat in Zomi numei Nu Pak na zang leuleu ahih manin Pasian in Zomite hong zatdan lamdang kasa a, nikhat niteh Zomite tung tawn in Pasian in na lamdang tampi leitungah hong semkhialai dingin ka lamen hi. Nu Pak hong genna ah hih mun ading leh kumpita ding thungen pawlkhat omin ah hih sung munkhat ah kimu khawmin thu ngetkhopna ki neizel hi. A tel mahmah mite bek uh ki helsak hong ci hi.
A inn mai ah tuiluang sialsial sak uha, va-ak kang leh vasa tuamtuam zong tua tuisung ah na kibual uh hi. Va-ak kang ka muh na mun thupi ah a thumveina hita a, va-ak kang kamuh ciangin Dr. Cinpu( Dr. Hau Za Cin) ka phawk pahpah hi. Bang hang hiam cih leh Melbourne ahawh lai-a, vaak kang leh sakhi kang a muhte hong gelhkhiat kasim kha a, za ngeilo mu ngeilo leh ummawh vetlo ka hih manin ka lungsim sungah lamdang sak‘luatna hong khang hi.
Hih Parliament Innpi mai-ah Zogam leitang Gullu Mual itna leh Zomi namte minam mangthang asuah ding a ut loh manun Australia gam aom minam it pawlkhat te’n a na lahkhiat na mun uh hi-a, thupi kasa mahmah hi. Amau pailai in eimi inn khat zong om nailo in pawlkhat vanleng tawh lengin, pawlkhat leilawm zui-in Mawtaw tawh sun le zan cilo in ni 1,2 bang a vapai uh hi mawk hi. A haksat dan, agim dan dinguh ka ngaihsun ngamkei hi. A mun atun uhteh gimnu cin ci-a, tuivot asuah ding, a na vaidawn ding kuamah omlo dinga, amau mah ki pei in ki tangzangsak dinguh cih ka ngaihsutteh New Delhi leh US Washington DC a omte kaphawk hi. Nai 1,2 sung gam le minam itna lakding in ani asim apai uh hi-a, thupi kasa hi. Hih mun Zomite tuallen na-ah ka paikhak, kava muh khak, ka vasik khak limlim manpha kasa hi.
A Innsungah laibu leh van tuamtuam ki zuakna zong omin kawlte nupi khat zong laibu sai ngak-in na om hi. Kawlpau tawh ka hopih uh leh Christian ahih na leh Presbyterain ah kikhawm ahih lam hong gen hi. Sia. Thangbawi kiangah Kawlgam ah ka omlai in Zangkong University ah laihilh kasem a, hih mun ah nasem nuam aom leh online panin zong kizong thei hi, cih gen hi. Capturning The Spirit of Australia’s National Capital cih laibu khat leh tawtang kepna sumngo a, abawl uh Parliament innlim atuang nih leh Australia gamlim khat phawknading dankhat in ka lei hi. Ka ciah dingteh keikia awng‘leng lah aki manna omlo in a lungsim paikhial hong kisading ahih manin nunghei kawmkawm in Zotate zaitha sanna innpi mai-aw, khangdamtuiluang, tulsing tuamtuam leh phialva tuamtuam tawh etlawm sicia, ci-in ka ciahsan mai hi.
Australia War Memorial Innpi Hawhna: Ni 15/01/15 Thursday ni-in hih mun kava en uh hi. Khangno galkap mangpi John Trelor hanciamna tawh May 1917 kum a, a napat uh hi-in ni 11 November 1941 ni-in na honna(opening ceremony) nei uh hi. Leitung galpi hangin galkap 102,000 kim si-in ciamteh uh a, gam le minam ading a, a nuntak na pia paltan te maan munkhat ah suang zihziah uh hi. A van zatte uh zong a lukhu, athau, gunkuang, tembaw, namsau, thautang,kawnggak cih bang dan a tuamtuam tampi tak kemcingh uh hi. Pawlkhat a lim tawh suai uha, a mel uh mihing mah tawh ki bangsak uh hi. A galkap len uh leh a gal kido lai tak uh, a ki thahlai tak, pawlkhatte a tuitawi laitak, sakol tawh a galkap laitak, pawlkhatte a sih dan cih bang‘ a tuamtuam koih uh hi. Ki etcim thei vetlo hi. Hici bang van le nate ka muhteh Zogam leitang itna hangin apham mi hangsan ngalliamte ka phawk a, en zong hici bang danin ki neithei, ki kemthei leh cih lunggulhna hong lut hi. Kawlgam leh gam tuamtuamte zong kihel uh hiding hiven, mun khat ah Burma na tuang in munkhat ah kawllai tawh haa(dental) tawh kisai na kigelh hi.
A inn pen golpi khat ahih ban-ah a dawldawl in lam uha, ni 2,3 sung bang ki enkhop ding hi. A gei ah tuikuangpi khat bawl uha, tua tui sungah huhna a pianuam te’n sumtang lawnsuk uh hi. Ka nung ka mai ua te’n zong lawnke uh ahih manin ko zong Sumtang.......... kalawn uh hi. Zomite huhna zong a kihelkha hita ei. A sungah ka vak leh laibu pawlkhat na kizuak a, hih inn tawh kisai laibu A PLACE TO REMEMBER AUSTRALIAN WAR MEMORIAL SOUVENIR PUBLICATION kici laibu khat kalei pah hi. Ka nai ka et uh leh nai 4:00pm hong sat dekta ahih manin mundang ennuam mahmahlaita le-ung kithawi in ka ciah uh hi. Sydney aom I sanggam lam te’n Sia. Thangbawite nupa Gospel dingin sam uh ahih manin amau zong kei tawh Sydney ciang kiton theiding ci-in tonkhawm nuam uha, meileng letmat ka ciahkawm un kala uh hi.
Tu hunlai tak Canberra pen nitak nai 9:30 kimin khua mial pan a, a zingciang’ ciahtading ka meileng uh zingsang nai 6:50 ahih manin ka lumbaih uh hi. Taxi ka genkhol uha, amau zong zingsang nai 5 sat madeuh in hong tung uh hi. Ko nai 4 in na thota ka hih manun kithawi khinin ka paipah uh hi. Taxi hawlpa pen India Punjabi ten a hi mawk a, lamdang kasa dektak hi. A hun lian mahin Meileng hong tunga Sydney zingsang nai 10:56am in tungin tua panin Sia. Thangbawite nupa tawh ka kikhen uha, Meileng ki khek in kei nai 11:41am in Sydney panin ka dingkhia hi. Ka tung hun ding pen nitak nai 8:50pm hi-a, khua nakmial mahmahta ding a hihteh ci-in zingciang kua’n vaineilo zawdeuh ding cih ngaihsun kawmin Coffs Harbour Zomi Innkuan President Pa Mang Phone in na manding leh hong dawnin ka cih leh aman’ zong kikhop neinung in ahih hangin hong dawn veve ning hong ci ahih manin lungdamin ka amen pah hi. A cih bangin ka tunlian leh amah zong a Mawtaw hoih pen tawh hong tunglian a, ka omna uh inn dong’ hong kha vingvengh hi.
Ka zin dingin Zomi Innkuan President khat in hong kha-in ka ciahteh Zomi Innkuan President khat mah-in hong dawn pen lamdang kasa a, gelkholhsa khat hileh zong kipelh kha kiauthei dinga, cih ka ngaihsutteh a beisa minam ading ka hih theihzah sitlo a ka ki helnate ka hawmthawh hi. Topa’n amau innkuan nih leh zin hong do a, asuk ato ah hong vakpih Sia. Thangbawite Innkuan thupha a zahtampi tawh na thuksak kikta hen.
Tutung Canberra ka zinbel a khua hun lah nuamin I Zogam tawh na ki bang pian a, muhnop tuamtuam tampi na om ahih manin ka kisik het kei hi. Australia gam na zin leh phaksawm hamtang in na kisik hetkei ding hi. Zintun nading zong nidang banglo in Pasian in Zomite tun’nang innkhat hong vaihawm sak khinta hi.
Khaibawi
__._,_.___
Post a Comment