AD 80 Kumpawl In Kawlgam Sung Ah Zomi te om Khin Uh Hi. .

Kawl kumpi Ava mangpa hong khan ma, AD 1596 pawlin Zomi pen kumpi ukna gam khat sung ah Kumpi khat in na om khin zo uhhi. AD 80 kum pawlin kawlgam sung ah Zomi te na tung khin zo uh hi cihpen kua ma' nial theih loh ding in Pong (Shan) mite khang simna ah tel tak in kiciam teh theih hi, Pong kumpi gam pen leitung aa gam thupi mahmah khat hi a, tua gam sung ah kumpi a sem masa pen KHUUL Lice a hihi. AD 80 pawl in gam uk kumpi za nangah hi.

Pong gam uk kumpi tepen Shan mite na hi uh a, tulai tak aa Thailand ( Judia ) ah tampi teng uh hi, tua mite pen kawlgam hong tunma un Sen gam NANCHAU-FU mun teng ah teng uh hi. KHUUL- Lice kumpi aa kipan MURGNAW kumpi pa ciang khang 30 pha uh aa AD 777 kumpawl in MURGNAW si hi, a mah a sih khit ciang in, a tapa SOOKAMPHA in kumpi sem aa MONGMAUR khuapi in zangh hi, SOOKAMPHA naupa SAMLONGPHA in FUNAN a kipan ASAM gam ciang dong gam keek aa Bumarputra gun kuam ah AHOM kumpi gam hong phut hi, tua laitak aa Pong kumpi te uk na gam pan NANCHAO (Vietnam ) Bengal, China leh Kawlzang buppi a hihi, PONG mite khang simna sung ah Zo ci-in Zomi te na kigelh khin uh hi.

Ref : Suk Zo Suan Bawm Khai page 1/2, NgaihTe Beh, Beh Lai Bu page 39,

Hih mun pan Zomi te pianna i ngaih sut kik teh, nidang in Zo cih minam na om aa tua Zo minam te hong khang suksuk a suan a khak te Zomi a kici hihang cih kilangh mahmah hi, Zo-Zomi a kibang cih na hi, lai nong simsak ka lung dam...

Sawm Pau