0
Zomi Nam Ni sunga thupi kasak mahmah khat pen inn sungah a tu thei khempeuh tu in a pua lam ah a ding thei khempeuh dingin dindel liangin hunzatna kiuap a, nopci khia mahmah hel zen hi. Tua bek hilo in a pua lam ah anzuakna om zihziah ahih manin tua kiim tengah Zomi te kitu zihziah a, vaimim, vokngoi, buhsih leh aksa, buhsih leh bawngsa, buhsih leh ngasa ban ah buhsih leh be-uih zong kingah lai hi! Tua ciangin khua khat hinapi nasepna tuamtuam hanga kimu mengmeng theilote kimu in lawmta kimu ngei nailote zong kimu in anne khawm, kiho khawm, maan kizaih khawm in nuam kisa mahmah hi. A kimu cil tawh, a kimu ngeilo kimu kik vat cih bang om ahih manin manpha ka sa diak hi. Zomi Nam Ni pen pawi bawl in nuamsa in a omkhawm bek hilo in a mimal mahmah kimu in kiho in lawm leh gual kikhawl in i om pen i Nam Ni a thupina leh a lawhcinna ahi hi. Nungak leh tangval a phone nambat uh a kipia thakte semsem pen Zomi Nam Ni manpha diak hi. Pawlkhat bangin Zomi Nam Ni sunga lawmngaihte tawh kimuhna hun pha hipah ahih cianga...(a min bel gen kei ni in). 


Zomi Cultural Uplift Society (ZOCUS) te in ngeina lam lahna hong nei uh a, mi 20 val in kikawi ngetngat in la khat hong sa uh a, mipi in pakta in khutbeng ziahziah in khutkawi mut tawh kinuamsa ngiat hi. A lam khempeuh numei leh pasal kihelh in, zopuan, zokhi, zodial leh zonik cih bang kibat tek ahih manin thupi ngiat hi. A la uh:


(a). Zo salphate hanlungciamna, lungtup khuamual a suah ni;

Zomi Nam Ni tuang hong tungta e. 


(b). Han zaisa in lambang pak ni siahtung siahphei a beina;

Zomite gual tungtuan ni hi e. 


Thupi ka sak tuam khat: 

Hih late a sak khit uh ciangin Sia Thamung in "Mat leh Hen a Thuakte" cih thu hong gen a, lungsim hong lawng mahmah hi. 


Tua tawh kiton in Zomi Association of Malaysia thudotpi tengin ZAM makaite khempeuh a sep gim, a tawlna khempeuh pahtawina hong nei uh a, kilawm mahmah a, zong pahtawi tak ahi uh hi. Zomi 30,000 val omte sun leh zan cilo in a kisap hun in delh in kem in khoi uh a, vaihawm in minam bitna ding, thongkiate hotkhiatna ding, cinate veh in sihna thuakte a luang nangawn uh pham uh hi. Minam nasepna ah a meetpih uh bangmah omlo a, khatveivei hawmthawh kampau peuh a bilkha vuah za in, khatveivei gensiat peuh thuak keikai mawk uh hi. Tuate khempeuh a palsat Zomi makaite a pahtawi Upa, nu leh pate ngaihsun siam kasa a, ei numei naupangte in i makaite a thuakna uh, a gimna uh phawklo in i genkhialh a om khak leh mawhmaina hong piata uh hen. 


Thutom genna Khampat khua pan hong zin Rev. Go Za Sum in hong gen a - thahbo, sumbo, siahtung, siahphei a bo ni Zomi Nam Ni ahih na hong gen hi. 


Laigelh kidemna Rev. Dr. Cin Sian Pau in a vaihawm pen pahtawina ngah dingte pahtawi piakna amah mah in hong nei pah a, mipi in dai dide, zahtakna lianpi tawh ki en dimdem hi. Zomi khangnote in Zomi Nam Ni hong piankhiatna thu" cih laigelh kidemna nei uh a, a khatna pan a thumna ciang pahtawina hoih mahmah pia in, a dang mi 5 zong pahtawina hoih vive mah kipia hi. A thupina diak pen pahtawina khempeuh pen mimal in a piak ngiat uh hi a, laigelh siamte a pahtawi nuamte in a pahtawina uh ahi hi. Zomi sungah laigelh siamte pahtawina hih bang hong om thei cih ka muh ciangin ka lungdamna thu keima aituam in kikhop tawp ciangin Sia Pau kiangah ka gen a, amah in zong a lawphuai dan leh maikum ciang zong hih toh zel a sawmna thu hong gen hi. A laigelhte uh sim theih dingin a kimu thei tam ciin ka ngen a (kei laigelh uk ka hih manin) Sia Pau in om thei kha inteh cih hong gen ciangin ka nuam mahmah hi. Khangnote in laigelh hong zop to zel ding uh thupi kasa hi. [Tun hih lai ka gelh laitak in laigelh khangnote khutma ka muh theih dingin ka kiangah Sia Pau in hong khak ka ngah lian hi]. Topa in Zomi khangnote Zokam Zolai zun den zo dingin thupha hong pia hen. 


Tawpna: 

Pasian in Zomi te singnuai gammual pan hong zonkhiat, hong laptoh, hong hotkhiat i hihna lungdamna la sa ziahziah in mipi in khutbengin Pasian min kiphat a, tua khit ciangin Rev. Thang Do Khen, Pastor, Zomi Christian Fellowship, Canaan in Topa tung lungdamkohna leh Thupha Piakna tawh hun khempeuh khak hi. Mipi lungdam a khutbeng zaizai in kitu thei nawnlo a, khat leh khat khut kilen in maan kizaih in, tuni hun nuam ngilhlohna dingin kihanciam hi. 


Hun in lah hong ngaklo, vai khempeuh lah nuamtak in kizota ahih manin, "Mai kum Zomi Nam Ni ah kimu kik ni aw" ciin lungdam maitai takin ka kikhenta uh hi. Mun khempeuh ah om Zomi Nam Ni zang khempeuh tungah a bucing khantohna hong pia Pasian thupha hong kicingta hen. 


Mai kum ciang kimu kik ni aw...





Hau Za Cin

Phuitong Liim

www.hauzacin.blogspot.com



He Knows How You Feel

Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.



He is able to run to the cry of those who are being tempted and tested and tried.

Hebrews 2:18 (AMP)



Whatever you are facing, He knows how you feel.

Post a Comment

 
Top