Date: 4 May, 2023
Ni khat sungin Meitei ten mi 16 hong thah sak, ciapteh khak loh om thei lai ding
Ni khat sungin Biakinn 26 kihal in ong suksiat sak uh, adang zong om thei lai kha ding
Khau 27 kang in kiciamteh lai
Imphal khuapi sunga teng Singtang mi 5,000 val in galkapte camp beel uh a, Meitei ten thah dingin umcih den lai uh hi
MLA Pu Vungzagin Valte CM pa tawh kimu a pai lam kalah Meitei ten vua in, Khuaphawk nailo, Delhi zato puak dingin special vanleng ngak lai, a dam zawh ding lamet omlo, a Inn zong haltum khin uh hi
India Central kumpi in galkap special force mi 300 vanlengpi tawh puak
Meitei ten Manipur Police Training Center luh in thau om teng laksak
Manipur state kumpi in buaina bawlte mun leh mun ah Police ten kap thei dingin order suah hi.
Manipur state ah Singtangmi (Tribal) Zomi leh Kuki ten lungphona nasiatak nei-in buaina piang –
Manipur state kumpi BJP party makaipi Chief Minister Biren Singh in Manipur gam sunga Zo suan ta singtang mite tenna mun leh gam zaipi tak Reserve Forest/Protected Areah sungah huam sak dingin Survey neih ding nakpitak in hanciam a, Hih project tangtung hi leh Reserved Area sungah mihing ten kiphallo ding ahih manin Meitei ten nam dangte a hawl khiat nopna lungsim cih kitel in, Tanglai sawt pek British uk hunlai akipan pupa luahsa gam leitang ah Singtangmite (Tribal) nawl khin a pampaih a om Zosuantate (Zomi leh Kuki) lungkimloh hong kipan hi.
Nung deuh in khua pawl khatah 2018 khit a inn kilamte JCB tawh suak siatsak uh a, Reserved area ciaptehna bawl ding a kuante zong Zomi MLA PU LM Khaute ngetna tawh CM Biren Singh in malakna khempeuh din khawl sak phot hi.
Hih bang thu hoihlo a om laitakin Zomite khuapi Lamka ah CM Biren Singh pai ding thu a zak uh ciang, mipi sin so in CM Lamka a pailohna dingin lampite khak in mipi’n buaina na bawl uh hi.
Tua kawm kal ah Meitei ten Schedule Tribe / ST kici (Singtangmi or minam neu) te hamphatna deih gawh in kumpi tungah ST na ngen uh ahih manin Schedule Tribe a kiciamteh Zo suanta teng lungkim theilo in tuni May 4, 2023 ni-in Lamka khuapi ah mi 30,000 val paikhawm in lungpho na nei uh a, Khuapi lian zaw deuh Pherzawl, Torbung, Kangpokpi leh Moreh khuate ah zong nasiatak in Zomi leh Kuki minamten lungphona nei uh hi.
Meitei minamte zong a mau omna tek panin ST status deih ngetna in lungphona na nei uh a, Torbung khua ah Programe a man khit uh ciangin lungphona nei Singtangmi (Tribal- Zomi/Kuki) leh Meitei te kitawng in buaina kipan a, Mawto leh Inn tampi hal in deng sia uh hi. Tuciang dongin Meitei leh Tribal ten khopna khuate ah inn kiban hal sak uh a, mipi kizan deih in tualgal a kipanpan cih ding khop in buaina nasia mahmah hi. -
2021 kum aa, Manipur aom India kumpi ciamtehna minam teng
Post a Comment