728x90 AdSpace

Latest News

GET UPDATES

CHIN NATIONAL DAY(ZOMI NAMNI) PIAN KHIAT ZIA.


Thumasa.

            Tedim,Tonzang gam a teeng minam ten Chin national day pen ei ai tuam bang khat in ngaih sun in ZOMI NAMNI ih ci hi.Ei khamtung Myone dang ten bang min a na vawh ding uh hiam cih zong ngaih sut ding kisam kha ding hi.Kei zong Tonzang pan 1964 kum in tan 7 ka awn khit ciang Kawlpi ah kapu te inn pan sang kah ka zom hi.Tan 9 kasim lai tak in Kawlpi ah a kibawl ngei nai lo ZOMI NAMNI bawl dingin Sia Suang Za Khup(JAT)tawh ka kikum uhhi.A mah zong hong lung lut bilbel in a kisam sum zong dingin kei hong kiseh pah hi.Ken zong sang naupang khat tung ah K 2/-ta ka don ciangin kibawl zo hi.Kei ngaih sut na ah ZOMI NAMNI ci-in lai kisuan na ah ki at ding ka sak leh Zolai in ki at lo-in Kawllai tawh Chin Amyiota nih cin tavuan nei ten hong at uhhi.Thu hong kigen ciangin Kawlpau vive tawh hong kigen hi.Hih ZOMI NAMNI bawl na sungah Falam;Haka leh Lusei te zong kihel hi.Tuate tawh pau kitheilo ihhih manin Kawlpau zat kul na hihi.Tua hun a kipan ZOMI NAMNI bang ci pian khiat hiam cih ka theih nop na hong khang in ka hih theih zah in ka kan toto hi.Hih ZOMI NAMNI pian khiat na zia ih tel theih ciang in ZOMI NAMNI thu laigil ciam kha thei pan dingin ka lam en hi.

Zomite' tangthu tom.

            Asia nisuah khanglam minam khempeuh Mongoloid minam pan (1) Mon-Khama.(2).Tibet-Myanmar.(3).Thai-Chinese min tawh ki pai suk in kiciamteh hi.Tibet-Myanmar minam sung pan in (1).Chin-Kachin.(2).Myanmar-Nidang Myanmar.(3).Lolo -Muhsoe cih bangin kiciamteh hi.Chin kici minam te pen Kawlgam ah Tagaung khua tung masa uhhi.Tagaung khua pan in Irawadi gun zui suk uh a Chindwin gun tawh kituah na mun ah hun sawtpi teeng uhhi.Pawl khat Chindwin gun kantan in Pakuko;Magwe leh Kawlgam zanglei mun tuamtuam ah ki zel in teeng uhhi.Pawl khat te Chidwin gun zuito in tua gun dung kuamah tawl khat teeng uhhi.Kawl ten Chinte teen na kuam a cih na un nidang a Talawadi gun a kici pen Chindwin gun min na ngah hi.Tua pan in gun kantan in Kalewa-Kalay zang kuam ah tawl khat a na teen khit uh ciangin Khamtung mun tuamtuamah kizelin kiteeng hi.Tua bangin atuam ciatin a kiteen ciangin kikawmna haksat banah gal le sa lau na hangin mun khat leh mun khat thu kizak na tawm mahmah ahih manin Chin a kici mi te a mun zui-in kampau leh minam lawhna min nangawn a nuai a bangin kilam dang hi.

(1).Naga mualtung Sumpara;Khamti;Mawlaik gam kuam ateeng Chin a kici te a mau le a mau Tangkhulkici uhhi.

(2).Tedim;Tonzang gam a teengte Zomi ih kici hi.

(3).Falam;Haka;Thantlang gam ateeng te Laimi kici uhhi.

(4).Matupi gam ateengte Mara;Zotung;Zophei kici uhhi

(5).Mindat;Kanpelet gam ateengte Cho kici uhhi.

(6).Paletwa gam gam ateengte  Khumi;Khami kici uhhi.

(7).Rakhine gamkhen pawlkhat ateengte Mru kici uhhi.

(8).Tilin;Longshe gam ateeengte Yaw kici uhhi.Hih Yaw minam te pen Eimi ten Chin sung ah ih hel pong hi-in a mau Kawl minam sung ah ki guang zaw uhhi.

(9).Gangaw gam ateengte Sungsi kici uhhi.

(10).Tamu;Kabaw zangkuam ateengte Kuki;Thadokici uhhi.

(11).Kawl gam laizang zang lei a teengteSho;Azo;Asho kici uhhi.

(12).Rakhine gamkhen pawlkhat ateengteKyaw;Chaw;Kyiang kici uhhi. Ei leh Ei Chin a kici omlo na pi Chin min ih ngah na pen Kawl ten hih minam te Kawllai in a at uh ciang Chin suak sak uh hi dingin ki um mawh hi.

            Chin hong kici minam te pen minam dang te sangin Kawlgam sung kitung masa zaw leh kilawm hi.Hong ki nawh khia kawikawi ahih man in gam kawm mualkawm teng a kitung na hihi.Dr.Vum Son in AD 1000 kim ciang in Kawl ten Ei mi te Chin cin hong sap uh hi cin na at hi.



Thang Khan Dal ( Tonzang )

Camp: KL, Malaysia

  • Blogger Comments
  • Facebook Comments

0 comments:

Post a Comment

Item Reviewed: CHIN NATIONAL DAY(ZOMI NAMNI) PIAN KHIAT ZIA. Rating: 5 Reviewed By: Thang Thawn Tuang Guite