Nidang lai in Manipur gam pen Pandit Jawaharlal Nehru in “Land of Jewels” ci-in na phat ngei hi. Hun hong pai zel in India gama state gaalmuang lo pen te laka khat hong suak ta hi. ‘State of bandh’ cih khawng peuh in ciamnuih/cihtak in kigen hi.
Manipur state geographical area 22,327 square kilometres hi. Manipur gam lei pen mun nih-Phaizaang (valley) leh singtaang (Hill Areas) in kikhen thei hi. Phaizaang pen Manipur state area 10% khawng bek pha hi. Singtaang bel Manipur area 90% pha zo hi. Phaizaang ah district 5 om in singtaang ah district 11 om hi. Phaizang a teeng te Hindu leh Muslim biakna zui Meitei minamte ahi uh hi. A ngeina (culture) uh Mainland India gam tawh kibang zaw hi. Tuamanin singtaang mite sangin India gam ah tuitum zaw uh hi.
Meitei te pen General Category, Other Backward Classes (OBC) leh Scheduled Caste (SC) ah om uh hi. Singtaang gama teengte pen Naga, Kuki, Zomi leh adangte ahi uh hi. Khristian biakna zui leh Scheduled Tribe (ST) tawh kiciamteh ahi uh hi.
Kum 2011 census in Manipur ah mihing 2,721,756 om hi. Tua laka 60% val pen phaizaang a teeng Meitei te ahi uh hi. Adang 40% phial pen singtaang a teeng Tribals (ST) te ahi uh hi. Kum 1949 in Manipur in India zom a, kum 1972 in Manipur in state ngah hi. Manipur State MLA seat 60 om lakah Meitei ten 40 ngah in, tribals ten 20 ngah uh hi. Manipur gamsung vaihawm pawl (State Legislative Assembly) ah Meitei a tam zawk man un, Meitei leh Tribals (singtaangmi) kikal kideidanna om to zel hi. Tua kideidanna khat pen budget allocation hi pah hi.
Manipur budget pan Hill areas ten Education ah 26% kiim, Health ah 25% kiim, Public Works ah 22% kiim, Social Welfare ah 12% kiim leh Agriculture ah 12% kiim bek ngah kha uh hi. Hih budget kikim loh luat manin khantohna (development) ah singtaang gam in phaizaang pha zo lo hi. Infrastructure lian khempeuh phaizaang bekah koih mawk uh hi.
Meitei te tamzaw ahihmanun tribals te dam dam in nawmvalh (assimilate) sawm uh hi. Nepali leh Konkani te tawh kituak in Meitei pau 8th Schedule ah kiciamteh hi. Tuaciangin, Meitei ten Manipur gama school khempeuh ah Meitei Lai compulsory in sinsak sawm uh hi. Meitei Erol Eyek Loinasinba Apunba Lup (MEELAL) ten Meitei lai (Meitei Majek) pen sumbuuk leh office sign board khempeuh ah zat dingin thusuah bawl uh hi. Kum 2007 in Nagate teenna Ukhrul, Tamenglong, Senapati leh Chandel district a private school nei ten, Board of Secondary Education, Manipur (BOSEM) pan paikhiat a, Nagaland Board of School Education (NBSE) tawh kizop zawk sawm uh hi. Manipur kumpi in “No Objection Certificate” a piak loh manin taang tung zo lo hi.
State Job Reservation a Tribals (ST) te’ satan zong lungkim huai lo hi. Manipur ah Tribal population 37% himahleh, job reservation 31% bek nei uh hi. Hibang kawm kalah Meitei ten Schedule Tribe (ST) status ngen lai mawk uh hi. Hih Sekmai, Phayeng, Khurkhul, Koutruk, Laimaram, Kwatha, Laimaram Khunou leh Andro lama teeng Meitei te Schedule Caste (SC) leh Other Backward Classes (OBC) in ki ciamteh khin hi. General Category a om Meitei ten Status a khek nop ua leh, SC leh OBC ah a khek zawk ding uh hi. Meitei ten ST status ngah mawk le uh tulaitaka ST a nahi sate adingin kumpi nasep ngah baihlo ding hi.
Manipur singtaang gamah hausa (chief) ten Village Authority Act, 1956 pansan in thunei lai uh hi. Manipur Land Revenue and Land Reforms (MLR&LR) Act 1960 leh Article 371C tungtawn in singtaang gamah phaizaang mi ten inn mun logam lei thei lo uh hi. Meitei te mimal tam mahle uh a area uh neu hi. Tua manin Meitei ten MLR&LR Act puahphat (amend) ding deih uh hi. Kum 2015 in Meitei makaih Manipur kumpi in Bills thum- ‘The Protection of Manipur Peoples (PMP) Bill, 2015’, ‘the Manipur Land Revenue & Land Reforms (MLR&R) (7thAmendment) Bill 2015’ leh ‘the Manipur Shops and Establishment (MS&E) (2ndAmendment) Bill 2015’, te passed uh hi. Hih Bills thum te pen Singtaang gamah Phaizaang mi ten sumbuuk (shop) hong thei in, inn mun logam a lei theih nang uh ahi hi. Tribals ten ‘Anti-Tribal Bills’ ci-in mi 9 ten a nuntakna uh bei lawh liangin nasia takin dal uh hi. Tua huhau in thunei sang zaw ten thukim pih lo uh a, hih Bills pen Acts suak zo lo, lawhcing lo hi.
Pu N. Biren Singh in Manipur Chief Minister hong sep ciangin Meitei leh Tribals kimuh khial nangin gamtat/kampauna hong nei hi. Biren Singh makaih Manipur kumpi in Reserved Forest/Protected Area/ Wetland/Sanctuary cih peuh tawh paulap tuam tuam zong in tribals te gam zai tak laksak hi. 11 April 2023 zingsang nai 2 kiim in Imphal khuapi a Khristian Biak Inn thum, Manipur kumpi nuaia PWD ten JCB tawh susia uh hi. Hih hangin Manipur tribals te bek tham lo in mundanga Khristian te lungkim lo uh hi. Tua banah Biren Singh in Manipur Zosuan te pen “illegal migrants”, “poppy cultivators” khawng ci-in a huat huai kammal zang hi. India kumpi tawh peaceful talk a nawngkai sak nop manin KNA leh ZRA te zong mipi lungphona ah kihel ci-in mawh paih zel hi. Meitei media lian ISTV te mah mah in zong Lamka lam Zosuan te pau pen “Foreign Language” cihsak hi.
3 may 2023 in Manipur a om singtaang miten Meitei makaih Manipur kumpi malak zia lungkimloh manin Hills District Headquarter khempeuh ah All Tribal Students Union Manipur (ATSUM) makaihna tawh ‘Tribal Solidarity March’ nei uh hi. Peaceful rally neih kikal in ‘Meitei Leepun’ ten Anglo Kuki War Memorial Gate susia uh hi. Rally neih khitciang inn lam zuan a ciah mite Meitei ten vuagawp banah singtaang khua bangzah hiam halsak uh hi. Tribals ten zong Meitei te inn a halsak pah uh hi. Tua a kipan buaina hong kibehlap to zel in, tu dinmun a tung hi ta hi.
By
Thangpi Naulak
Post a Comment